صحیح ابن حبان

سیدنا انس بن مالک رضی اللہ عنہ بیان کرتے ہیں: نبی اکرم صلی اللہ علیہ وسلم نے خیبر اور مدینہ منورہ کے درمیان کسی جگہ پر تین دن تک قیام کیا آپ نے سیدہ صفیہ بنت حیی رضی اللہ عنہا کی رخصتی کروائی تھی میں اہل ایمان کو نبی اکرم صلی اللہ علیہ وسلم کے ولیمے کے لئے بلا کر لایا تھا اس میں روٹی یا گوشت نہیں تھا۔ نبی اکرم صلی اللہ علیہ وسلم نے ہمیں دسترخوان لانے کا حکم دیا تو اس دسترخوان پر کھجوریں، پنیر اور گھی رکھ دیا گیا، یہ نبی اکرم صلی اللہ علیہ وسلم کا ولیمہ تھا۔ مسلمانوں نے کہا: یہ امہات المؤمنین میں سے ایک شمار ہوں گی یا نبی اکرم صلی اللہ علیہ وسلم کی کنیز شمار ہوں گی، تو دوسروں نے جواب دیا: اگر نبی اکرم صلی اللہ علیہ وسلم نے ان کا پردہ کروایا تو یہ امہات المؤمنین میں شمار ہوں گی اگر پردہ نہ کروایا تو یہ آپ کی کنیز شمار ہوں گی۔
(راوی بیان کرتے ہیں:) جب نبی اکرم صلی اللہ علیہ وسلم روانہ ہونے لگے تو آپ نے اس خاتون کے لئے اپنے پیچھے جگہ بنائی اور اس خاتون کے اور لوگوں کے درمیان پردہ کھینچ دیا۔