صحیح ابن حبان

سیدنا واثلہ بن اسقع رضی اللہ عنہ بیان کرتے ہیں: میں نے سیدنا علی رضی اللہ عنہ کے گھر میں ان کے بارے میں دریافت کیا: تو مجھے یہ بتایا گیا کہ وہ گئے ہوئے ہیں اور نبی اکرم صلی اللہ علیہ وسلم کے ساتھ آئیں گے پھر وہ آ گئے نبی اکرم صلی اللہ علیہ وسلم گھر کے اندر تشریف لے آئے، میں بھی اندر آ گیا نبی اکرم صلی اللہ علیہ وسلم بچھونے پر تشریف فرما ہوئے آپ صلی اللہ علیہ وسلم نے سیدہ فاطمہ رضی اللہ عنہا کو اپنے دائیں طرف اور سیدنا علی رضی اللہ عنہ کو اپنے بائیں طرف، سیدنا حسن رضی اللہ عنہ اور سیدنا حسین رضی اللہ عنہ کو اپنے آگے بٹھا لیا آپ صلی اللہ علیہ وسلم نے (یہ آیت تلاوت کی) ” اے اہل بیت اللہ تعالیٰ یہ چاہتا ہے کہ تم سے گندگی کو دور کر دے اور تمہیں اچھی طرح سے پاک و صاف کر دے۔ “ (پھر آپ صلی اللہ علیہ وسلم نے فرمایا:) اے اللہ! یہ میرے اہل بیت ہیں۔
سیدنا واثلہ رضی اللہ عنہ بیان کرتے ہیں: انہوں نے گھر کے کنارے سے کہا: یا رسول اللہ! میں بھی آپ صلی اللہ علیہ وسلم کے اہل بیت میں سے ہوں۔ نبی اکرم صلی اللہ علیہ وسلم نے فرمایا: تم بھی میرے اہل بیت میں سے ہو۔ سیدنا واثلہ رضی اللہ عنہ کہتے ہیں: میں جس چیز کی امید کر سکتا تھا یہ ان میں سب سے زیادہ قابل دید چیز تھی۔