صحیح ابن حبان

سیدنا عبداللہ بن عمر رضی اللہ عنہما بیان کرتے ہیں: جب سیدنا عمر بن خطاب رضی اللہ عنہ نے اسلام قبول کیا، تو قریش کو ان کے اسلام قبول کرنے کا پتہ نہیں چلا انہوں نے فرمایا: اے اہل مکہ! تم میں سے کون شخص سب سے اچھی گفتگو کر سکتا ہے (یعنی سب سے زیادہ سمجھ دار ہے) لوگوں نے بتایا: جمیل بن معمر جمحی۔ تو سیدنا عمر رضی اللہ عنہ اس کے پاس تشریف لے گئے میں بھی ان کے ساتھ تھا میں ان کے پیچھے چل رہا تھا جو کچھ مجھے نظر آ رہا تھا وہ بات مجھے سمجھ آ رہی تھی اور میں اسے سن رہا تھا سیدنا عمر رضی اللہ عنہ اس شخص کے پاس آئے اور بولے: اے جمیل میں نے اسلام قبول کر لیا ہے۔ سیدنا عبداللہ بن عمر رضی اللہ عنہما کہتے ہیں: اللہ کی قسم! اس نے سیدنا عمر رضی اللہ عنہ کو کوئی جواب نہیں دیا، یہاں تک کہ وہ اس کے ساتھ مسجد حرام کی طرف آئے اور قریش کی بیٹھکوں کے درمیان اس نے یہ اعلان کیا اے قریش کے گروہ خطاب کا بیٹا بے دین ہو گیا ہے۔ سیدنا عمر رضی اللہ عنہ نے کہا: اس نے جھوٹ کہا: ہے بلکہ میں نے اسلام قبول کر لیا ہے اور میں اللہ تعالیٰ پر ایمان لے آیا ہوں اور میں نے اس کے رسول کی تصدیق کر دی ہے، تو ان لوگوں نے سیدنا عمر رضی اللہ عنہ پر حملہ کر دیا، سیدنا عمر رضی اللہ عنہ بھی ان کے ساتھ لڑنے لگے، یہاں تک کہ ان کے سروں پر سورج غروب ہو گیا (یعنی کافی دیر تک لڑائی ہوتی رہی) یہاں تک کہ سیدنا عمر رضی اللہ عنہ الگ ہو کر بیٹھ گئے وہ لوگ سیدنا عمر رضی اللہ عنہ کے سرہانے کھڑے تھے سیدنا عمر رضی اللہ عنہ نے کہا: تمہیں جو مناسب لگتا ہے تم کر لو، اللہ کی قسم! اگر ہم تین سو لوگ ہو گئے تو یا تو تم اسے ہمارے لیے چھوڑ دو گے یا پھر ہم اسے تمہارے لیے چھوڑ دیں گے، ابھی وہ لوگ اسی حالت میں سیدنا عمر رضی اللہ عنہ کے پاس کھڑے ہوئے تھے ایک شخص آیا جس نے ریشمی حلہ پہنا ہوا تھا اور قومسی قمیض پہنی ہوئی تھی، اس نے دریافت کیا: تم لوگوں کا کیا معاملہ ہے ان لوگوں نے بتایا: خطاب کا بیٹا بے دین ہو گیا ہے اس نے کہا: اسے چھوڑ دو کیونکہ ایک شخص نے اپنی ذات کے لیے دین کو اختیار کیا ہے کیا تم لوگ یہ گمان کرتے ہو کہ بنو عدی اپنے ساتھی (یعنی اپنے ایک فرد) کو تمہارے سپرد کر دیں گے۔ راوی کہتے ہیں: تو یوں تھا جیسے ان کی آنکھوں پر پردہ پڑا ہوا تھا، جو ہٹ گیا۔
سیدنا عبداللہ بن عمر رضی اللہ عنہما بیان کرتے ہیں: بعد میں مدینہ منورہ میں، میں نے سیدنا عمر رضی اللہ عنہ سے دریافت کیا: ابا جان وہ شخص کون تھا؟ جس نے اس دن دوسرے لوگوں کو آپ سے پرے کیا تھا، تو سیدنا عمر رضی اللہ عنہ نے فرمایا: اے میرے بیٹے وہ عاص بن وائل تھا۔