صحیح ابن حبان

عبدالرحمن بن شماسہ بیان کرتے ہیں: وہ مسلمہ بن مخلد کے پاس موجود تھے ان کے پاس سیدنا عبداللہ بن عمرو رضی اللہ عنہ بھی موجود تھے۔ سیدنا عبداللہ رضی اللہ عنہ نے فرمایا: قیامت صرف بدترین لوگوں پر قائم ہو گی اور وہ اہل جاہلیت سے بھی زیادہ برے لوگ ہوں گے۔ وہ اللہ تعالیٰ سے جو بھی چیز مانگیں اللہ تعالیٰ ان کی دعا کو قبول نہیں کرے گا۔ ابھی وہ اسی حالت میں تھے کہ اسی دوران میں سیدنا عقبہ بن عامر رضی اللہ عنہ آ گئے۔ تو مسلمہ نے ان سے کہا: اے عقبہ! آپ سنیے کہ سیدنا عبداللہ رضی اللہ عنہ کیا بیان کر رہے ہیں۔ تو عقبہ نے کہا: وہ زیادہ علم رکھتے ہیں بہرحال جہاں تک میری بات ہے تو میں نے نبی اکرم صلی اللہ علیہ وسلم کو یہ بات ارشاد فرماتے ہوئے سنا ہے: ” میری امت کا ایک گروہ ہمیشہ اللہ کے دین کے معاملے میں جنگ کرتا رہے گا اور وہ اپنے دشمنوں پر غالب رہیں گے ان کی خلاف ورزی کرنے والے لوگ ان کو کوئی نقصان نہیں پہنچا سکیں گے یہاں تک کہ ان تک قیامت آ جائے گی مگر وہ اسی حالت میں ہوں گے۔ “ پھر سیدنا عبداللہ رضی اللہ عنہ نے بتایا: تو اللہ تعالیٰ ایک ہوا کو بھیجے گا جس کی خوشبو مشک کی خوشبو کی مانند ہو گی اور وہ چھونے میں ریشم کی طرح ہو گی، تو وہ ایسے کسی شخص کو نہیں چھوڑے گی، جس کے دل میں رائی کے دانے کے وزن جتنا ایمان ہو گا مگر یہ کہ اس کی روح قبض کر لے گی پھر بدترین لوگ باقی رہ جائیں گے اور انہی لوگوں پر قیامت قائم ہو گی۔