صحیح ابن حبان

ابراہیم بیان کرتے ہیں: علقمہ شام گئے وہ وہاں مسجد میں آئے وہاں انہوں نے دو رکعات ادا کی پھر دعا کی: اے اللہ! مجھے نیک ہم نشین عطا کر پھر وہ سیدنا ابودرداء رضی اللہ عنہ کی خدمت میں حاضر ہوئے تو انہوں نے دریافت کیا تم کہاں سے تعلق رکھتے ہو، انہوں نے جواب دیا: کوفہ سے انہوں نے دریافت کیا: کیا تمہارے درمیان نبی اکرم صلی اللہ علیہ وسلم کے خاص راز دان موجود نہیں ہیں کہ اس راز کا ان کے علاوہ کسی کو پتا نہیں ہوتا تھا اور وہ سیدنا حذیفہ رضی اللہ عنہ ہیں۔ کیا تمہارے درمیان وہ صاحب موجود نہیں ہیں۔ جنہیں اللہ تعالیٰ نے اپنے نبی صلی اللہ علیہ وسلم کے زبانی شیطان سے محفوظ قرار دیا اور وہ سیدنا عمار بن یاسر رضی اللہ عنہ ہیں۔ کیا تمہارے درمیان سیاہی والے شخص سیدنا عبداللہ بن مسعود رضی اللہ عنہ نہیں ہیں۔ سیدنا ابودرداء رضی اللہ عنہ نے دریافت کیا تم یہ آیت کیسے پڑھتے ہو: «و اللیل إِذَا يَغْشَى وَالنَّهَارِ إِذَا تَجَلَّى»، میں نے کہا: «وَالذَّكَرِ وَالْاُنْثٰى» سیدنا ابودرداء رضی اللہ عنہ نے فرمایا: یہ لوگ مسلسل مجھے اس بارے میں شبہ کا شکار کرتے رہے ہیں حالانکہ میں نے نبی اکرم صلی اللہ علیہ وسلم کی زبانی خود یہ آیت (اسی طرح) سنی ہے۔