صحیح ابن حبان

سیدنا محمد بن حاطب رضی اللہ عنہ اپنی والدہ سیدہ ام جميل بنت مجلل رضی اللہ عنہا کا یہ بیان نقل کرتے ہیں: میں تمہیں لیکر حبشہ کی سرزمین سے آئی ابھی مدینہ منورہ آئے ہوئے ایک یا دو راتیں گزری تھیں کہ میں نے تمہارے لیے کھانا تیار کیا لکڑیاں ختم ہو گئیں میں لکڑیوں کی تلاش میں نکلی تم نے ہنڈیا کو پکڑا اور اپنی کلائی کے اوپر انڈیل لیا میں تمہیں لے کر نبی کریم صلی اللہ علیہ وسلم صلی اللہ علیہ وسلم کی خدمت میں حاضر ہوئی میں نے عرض کی: یا رسول اللہ صلی اللہ علیہ وسلم! یہ محمد بن حاطب ہے اور یہ پہلا بچہ ہے، جس کا نام آپ صلی اللہ علیہ وسلم کے اسم مبارک پر رکھا گیا ہے سیدہ ام جمیل رضی اللہ عنہا بیان کرتی ہیں: تو نبی اکرم صلی اللہ علیہ وسلم نے اپنا لعاب دہن تمہارے منہ میں ڈالا تمہارے سر پر دست مبارک پھیرا اور تمہارے لیے دعا کی اور یہ کہا: ” تو تکلیف کو دور کر دے، اے لوگوں کے پروردگار! تو شفا عطا کر دے، تو ہی شفا عطا کرنے والا ہے شفا صرف وہی ہے، جو تو عطا کرے ایسی شفا عطا کر دے جو بیماری کو نہ رہنے دے۔ “ سیدہ ام جمیل رضی اللہ عنہا بیان کرتی ہیں: ابھی میں نبی اکرم صلی اللہ علیہ وسلم کی خدمت سے تمہیں لے کر اٹھی نہیں تھی کہ تمہارا ہاتھ ٹھیک ہو گیا تھا۔