صحيح الادب المفرد

سیدنا ابوہریرہ رضی اللہ عنہ نبی صلی اللہ علیہ وسلم سے روایت کرتے ہیں کہ آپ صلی اللہ علیہ وسلم نے فرمایا : ”دو آدمی گالی گلوچ کریں تو گناہ ابتدا ء کرنے والے پر ہو گا ، بشرطیکہ مظلوم (جس کو پہلے گالی دی گئی ) نے حد سے تجاوز نہ کیا ہو ۔ “

سیدنا انس بن مالک رضی اللہ عنہ نبی صلی اللہ علیہ وسلم سے روایت کرتے ہیں کہ آپ صلی اللہ علیہ وسلم نے فرمایا : ”دو آدمی جب گالی گلوچ کریں تو گناہ ابتداء کرنے والے پر ہو گا جب تک کہ مظلوم زیادتی نہ کرے ۔ “

اور نبی صلی اللہ علیہ وسلم نے فرمایا : ”کیا تم جانتے ہو کہ «عضه» (بہتان)کیا ہے ؟“ لوگوں نے عرض کیا : اللہ اور اس کا رسول زیادہ جاننے والے ہیں ، فرمایا : ”بات کو ایک آدمی سے دوسرے آدمی تک پہنچانا تاکہ ان لوگوں میں فساد برپا ہو جائے ۔“

اور نبی صلی اللہ علیہ وسلم نے فرمایا : ”اللہ عزوجل نے میری طرف وحی نازل فرمائی ہے کہ عاجزی اختیار کرو ، اور تم میں سے کوئی دوسرے پر ظلم نہ کرے ۔ “