صحيح الادب المفرد

ہلال بن یساف کہتے ہیں کہ ہم سوید بن مقرن کے گھر میں کپڑا فروخت کر رہے تھے ۔ ایک لونڈی نکلی ، اس نے کسی آدمی کو کو ئی بات کہہ دی ۔ اس آدمی نے لونڈی کو طمانچہ مار دیا تو سوید بن مقرن نے اس سے کہا: کیا تم نے اس کے منہ پر طمانچہ مار دیا ؟ میں نے اپنے آپ کو سات اشخاص میں سے ایک پایا (یعنی ہم لوگ سات آدمی تھے ) اور ہمارے پاس ایک ہی خادم تھا ۔ ہم میں سے ایک آدمی نے اسے طمانچہ مار دیا تو نبی صلی اللہ علیہ وسلم نے حکم دیا کہ اسے آزاد کر دیا جائے ۔

(معاویہ بن سوید بن مقرن کہتے ہیں :) میں نے ہمارے ایک غلام کو تھپڑ مارا تو وہ بھاگ گیا ، میرے والد نے مجھے بلایا اور اس (غلام) سے کہا : اس سے بدلہ لے لو ۔ (پھر فرمایا :) ہم مقرن کی اولاد سات (بھائی) تھے ، ہماری ایک ہی خادمہ تھی ، ہم میں سے ایک نے اسے تھپڑ مار دیا ، یہ بات نبی صلی اللہ علیہ وسلم سے ذکر کی گئی تو آپ صلی اللہ علیہ وسلم نے فرمایا : ”انہیں حکم دو کہ اسے آزاد کر دیں ۔“ نبی صلی اللہ علیہ وسلم سے عرض کیا گیا : ان کے پاس اس کے علاوہ کوئی خادم نہیں ۔ آپ صلی اللہ علیہ وسلم نے فرمایا : ”تو وہ اس سے خدمت لیتے رہیں ، جب (اس سے) بے نیاز ہو جائیں تو اسے آزاد کر دیں ۔“

اور ایک دوسری روایت میں ہے : ابوشعبہ ، سیدنا سوید بن مقرن مزنی رضی اللہ عنہ سے روایت کرتے ہیں — انہوں نے ایک آدمی کو دیکھا جس نے اپنے غلام کو تھپڑ مارا تھا — تو فرمایا : کیا تمہیں معلوم نہیں کہ چہرہ حرمت والا ہے (اس پر مارنا حرام ہے) ؟ میں نے اپنے آپ کو دیکھا ہے کہ رسول اللہ صلی اللہ علیہ وسلم کے زمانے میں میں سات بھائیوں میں سے ساتواں تھا ، ہمارے پاس صرف ایک خادم تھا ، ہم میں سے ایک نے اسے تھپڑ مار دیا تو نبی صلی اللہ علیہ وسلم نے ہمیں حکم دیا کہ ہم اسے آزاد کر دیں ۔

ابوعمر زاذان سے روایت ہے ، وہ بیان کرتے ہیں کہ ہم لوگ سیدنا ابن عمر رضی اللہ عنہما کے پاس تھے ۔ تو انہوں نے اپنے غلام کو بلایا جسے انہوں نے مارا تھا ۔ انہوں نے اس کی پیٹھ سے کپڑا ہٹایا ۔ کہا: کیا تمہیں تکلیف ہو رہی ہے ؟ اس نے کہا: نہیں ۔ تو انہوں نے غلام کو آزاد کر دیا ، پھرتنکا زمین سے اٹھا کر کہا کہ مجھے اس کا اتنا بھی اجر نہیں ملے گا جتنا اس تنکے کا وزن ہے ۔ میں نے کہا: اے ابوعبدالرحمان ! آپ ایسا کیوں کہتے ہیں ۔ کہا کہ میں نے نبی صلی اللہ علیہ وسلم سے سنا ہے ، آپ صلی اللہ علیہ وسلم فرماتے تھے یا آپ صلی اللہ علیہ وسلم نے ارشاد فرمایا : ”جو شخص اپنے غلام کو بےقصور حد لگائے یا اس کی چہرے پر طمانچہ مار دے“ اور ایک روایت میں ہے : ”جس نے اپنے غلام کے چہرے پر تھپڑ مارا یا اسے ایسی حد لگائی جس کا اس نے ارتکا ب نہیں کیا تو اس کا کفارہ یہ ہے کہ اسے آزاد کر دے ۔“