صحيح الادب المفرد

طیسلہ بن میاس سے روایت ہے وہ کہتے ہیں : میں نجدہ بن عامر خارجی کے پیروکار کے ساتھ تھا ، ( یہ خارجیوں کی ایک جماعت ہے ) میں نے ایسے گناہوں کا ارتکاب کیا جن کو میں کبائر ہی خیال کرتا ہوں ، تو میں نے اس کا تذکرہ سیدنا ابن عمر رضی اللہ عنہما سے کیا تو انہوں نے پوچھا: وہ کون کون سے گناہ ہیں ؟ میں نے کہا: ایسے ایسے ، انہوں نے کہا: یہ کبائر نہیں ہیں ۔ وہ تو نو ہیں : اللہ کے ساتھ شریک کرنا ، کسی جان کو قتل کرنا ، جنگ سے فرار ہونا ، پاکدامن عورت پر بدکاری کی تہمت لگانا ، سود کھانا ، یتیم کا مال کھانا ، مسجد میں کفر (بےدینی) کا ارتکاب کرنا ، وہ آدمی جو (دین کا) مذاق اڑاتا ہے ، والدین کا ( بیٹے کی) نافرمانی کی وجہ سے رونا ۔ سیدنا ابن عمر رضی اللہ عنہما نے مجھ سے کہا: کیا تم جہنم سے ڈرتے ہو اور چاہتے ہو جنت میں داخل ہو جاؤ؟ میں نے کہا: ہاں اللہ کی قسم ۔ پوچھا: کیا تمہارے والدین زندہ ہیں ؟ میں نے کہا: میرے پاس میری والدہ ہیں ۔ انہوں نے کہا: اللہ کی قسم ! اگر تو اس کے ساتھ نرمی کے ساتھ بولے : اور اس کو کھانا کھلائے تو تم جنت میں داخل ہو جاؤ گے جب تک کبیرہ گناہوں سے بچو گے ۔

عروہ سے مروی ہے ، انہوں نے فرمایا : ‏ «‏وَاخْفِضْ لَهُمَا جَنَاحَ الذُّلِّ مِنَ الرَّحْمَةِ‏» ”رحمت سے اپنے عاجزی کے بازو ان کے سامنے جھکا دو۔ “ اور کہا: ایسی چیز سے انکار نہ کرنا جس کو تیرے والدین پسند کریں ۔