سنن نسائي

´انس رضی اللہ عنہ سے روایت ہے کہ` رسول اللہ صلی اللہ علیہ وسلم جب پاخانہ جاتے تو اپنی انگوٹھی اتار لیتے ۱؎ ۔

´عبداللہ بن عمر رضی اللہ عنہما کہتے ہیں کہ` رسول اللہ صلی اللہ علیہ وسلم نے سونے کی ایک انگوٹھی بنوائی اور اس کا نگینہ اپنی ہتھیلی کی طرف رکھا ، پھر لوگوں نے بھی سونے کی انگوٹھیاں بنوائیں ، تو آپ نے اپنی انگوٹھی نکال پھینکی اور فرمایا : ” میں اسے کبھی نہیں پہنوں گا “ پھر لوگوں نے بھی اپنی انگوٹھیاں نکال پھینک دیں ۱؎ ۔

´عبداللہ بن عمر رضی اللہ عنہما سے روایت ہے کہ` رسول اللہ صلی اللہ علیہ وسلم نے سونے کی انگوٹھی بنوائی اور اس کا نگینہ ہتھیلی کی طرف رکھا ۔ پھر لوگوں نے بھی انگوٹھیاں بنوائیں ، تو آپ نے وہ انگوٹھی نکال پھینکی اور فرمایا : ” میں اسے کبھی نہیں پہنوں گا “ ۔

´عبداللہ بن عمر رضی اللہ عنہما کہتے ہیں کہ` نبی اکرم صلی اللہ علیہ وسلم نے سونے کی ایک انگوٹھی پہنی پھر اسے نکال کر پھینک دی اور چاندی کی انگوٹھی پہنی اور اس میں «محمد رسول اللہ» نقش کرایا اور فرمایا : ” کسی کے لیے مناسب نہیں کہ وہ میری اس انگوٹھی کے نقش کی طرح نقش کرائے “ ، پھر آپ نے اس کے نگینے کو ہتھیلی کی جانب کر لیا ۔

´عبداللہ بن عمر رضی اللہ عنہما سے روایت ہے کہ` رسول اللہ صلی اللہ علیہ وسلم نے تین دن تک سونے کی انگوٹھی پہنی ، پھر جب صحابہ کرام رضی اللہ عنہم نے آپ کو دیکھا تو سونے کی انگوٹھی عام ہو گئی ۔ یہ دیکھ کر آپ نے اسے نکال پھینکا ۔ پھر معلوم نہیں وہ کیا ہوئی ، پھر آپ نے چاندی کی انگوٹھی کا حکم دیا اور حکم دیا کہ اس میں ” محمد رسول اللہ “ نقش کر دیا جائے ، وہ انگوٹھی رسول اللہ صلی اللہ علیہ وسلم کے ہاتھ میں رہی یہاں تک کہ آپ کی وفات ہو گئی ، پھر ابوبکر رضی اللہ عنہ کے ہاتھ میں رہی یہاں تک کہ وہ بھی وفات پا گئے ، پھر عمر رضی اللہ عنہ کے ہاتھ میں رہی یہاں تک کہ وہ بھی وفات پا گئے ، پھر عثمان رضی اللہ عنہ کے ہاتھ میں ان کی مدت خلافت کے چھ سال تک رہی ، پھر جب خطوط کثرت سے لکھے جانے لگے تو اسے انصار کے ایک شخص کے حوالے کر دیا ، وہ اس سے مہریں لگاتا تھا ۔ ایک بار وہ انصاری عثمان رضی اللہ عنہ کے ایک کنوئیں پر گیا ، تو وہ انگوٹھی ( اس میں ) گر گئی ، اور تلاش کے باوجود نہ ملی ۔ پھر اسی جیسی انگوٹھی بنانے کا حکم ہوا اور اس میں ” محمد رسول اللہ “ نقش کیا گیا ۔

´عبداللہ بن عمر رضی اللہ عنہما سے روایت ہے کہ` رسول اللہ صلی اللہ علیہ وسلم نے سونے کی ایک انگوٹھی بنوائی ، اس کا نگینہ آپ اپنی ہتھیلی کی طرف رکھتے تھے ، پھر لوگوں نے بھی سونے کی انگوٹھیاں بنوائیں ، یہ دیکھ کر آپ نے اسے نکال پھینکی تو لوگوں نے بھی اپنی انگوٹھیاں نکال پھینکیں ، پھر آپ نے چاندی کی ایک انگوٹھی بنوائی ، اس سے آپ ( خطوط پر ) مہریں لگاتے تھے ، اسے پہنتے نہیں تھے ۱؎ ۔