سنن نسائي

´عبداللہ بن عمر رضی اللہ عنہما کہتے ہیں کہ` رسول اللہ صلی اللہ علیہ وسلم نے سونے کی انگوٹھی بنوائی ، پھر اسے پہنا ، تو لوگوں نے بھی سونے کی انگوٹھی بنوائی ، آپ نے فرمایا : ” میں یہ انگوٹھی پہنتا تھا لیکن اب کبھی نہیں پہنوں گا “ اور اسے پھینک دی تو لوگوں نے بھی اپنی انگوٹھیاں پھینک دیں ۔

´علی رضی اللہ عنہ کہتے ہیں کہ` مجھے نبی اکرم صلی اللہ علیہ وسلم نے سونے کی انگوٹھی ، ریشم ، سرخ گدیوں اور گیہوں یا جو کی شراب سے منع فرمایا ۔

´علی رضی اللہ عنہ سے روایت کہ` رسول اللہ صلی اللہ علیہ وسلم نے سونے کی انگوٹھی ، ریشمی کپڑے اور سرخ زین ( گدے ) کے استعمال سے منع فرمایا ۔

´علی رضی اللہ عنہ کہتے ہیں کہ` رسول اللہ صلی اللہ علیہ وسلم نے سونے کے چھلوں ، سرخ زین ، ریشمی کپڑے اور جعہ سے منع فرمایا ، جعہ ایک قسم کی شراب ہے جو جو اور گیہوں سے بنائی جاتی ہے ۔ اور راوی نے اس کی شدت ( تیزی ) کا ذکر کیا ۔ ( ابوعبدالرحمٰن نسائی کہتے ہیں : ) عمار بن رزیق نے اس حدیث کو زہیر کے برخلاف ابواسحاق سے ، ابواسحاق نے صعصعہ سے ، اور صعصہ نے علی رضی اللہ عنہ سے روایت کیا ہے ۔

´علی رضی اللہ عنہ کہتے ہیں کہ` رسول اللہ صلی اللہ علیہ وسلم نے مجھے سونے کے چھلوں ، ریشمی کپڑوں ، سرخ زین ، جَو اور گیہوں کے شراب سے منع فرمایا ۔ ابوعبدالرحمٰن ( نسائی ) کہتے ہیں : اس سے پہلی حدیث زیادہ قرین صواب ہے ۱؎ ۔

´صعصعہ بن صوحان کہتے ہیں کہ` میں نے علی رضی اللہ عنہ سے کہا : آپ ہمیں منع فرمایئے اس چیز سے جس سے آپ کو رسول اللہ صلی اللہ علیہ وسلم نے منع فرمایا ، وہ بولے : مجھے منع فرمایا : کدو سے بنے اور سبز رنگ کے برتن سے ، سونے کے چھلے ، ریشمی لباس اور حریر اور سرخ زین کے استعمال سے ۔

´مالک بن عمیر کہتے ہیں کہ` صعصعہ بن صوحان نے علی رضی اللہ عنہ کے پاس آ کر عرض کیا : آپ ہمیں اس چیز سے منع کریں جس سے رسول اللہ صلی اللہ علیہ وسلم نے آپ کو منع فرمایا ہے ، کہا : ہمیں رسول اللہ صلی اللہ علیہ وسلم نے کدو سے بنے ، سبز رنگ والے اور کھجور کی لکڑی سے بنے برتنوں کے استعمال سے اور جَو اور گیہوں کی شراب پینے سے منع فرمایا اور ہمیں سونے کے چھلے ، ریشم اور حریر کے لباس اور سرخ زین کے استعمال سے منع فرمایا ۱؎ ۔

´مالک بن عمیر کہتے ہیں کہ` صعصعہ بن صوحان نے علی رضی اللہ عنہ سے کہا کہ امیر المؤمنین ! ہمیں اس چیز سے منع فرمائیے جس چیز سے رسول اللہ صلی اللہ علیہ وسلم نے آپ کو منع فرمایا تو وہ بولے : ہمیں رسول اللہ صلی اللہ علیہ وسلم نے کدو سے بنے ، اور سبز رنگ والے برتن کے استعمال سے اور جو اور گیہوں سے بنی شراب کے پینے سے ، سونے کے چھلے ، ریشمی لباس اور سرخ زین کے استعمال سے منع فرمایا ۔ ابوعبدالرحمٰن ( نسائی ) کہتے ہیں : مروان اور عبدالواحد کی روایت ( نمبر ۵۱۷۳ و ۵۱۷۴ ) اسرائیل کی روایت ( نمبر ۵۱۷۲ ) سے زیادہ قرین صواب ہے ۔

´علی رضی اللہ عنہ کہتے ہیں کہ` مجھے میرے محبوب رسول اللہ صلی اللہ علیہ وسلم نے تین چیزوں سے منع فرمایا ، میں یہ نہیں کہتا کہ آپ نے لوگوں کو منع فرمایا ، بلکہ مجھے منع فرمایا : سونے کی انگوٹھی پہننے سے ، ریشمی لباس پہننے سے ، زرد رنگ سے جو چمکیلا اور لال ہو ، اور رکوع و سجدے کی حالت میں قرآن پڑھنے سے ۱؎ ۔ ضحاک بن عثمان نے داود بن قیس کی متابعت کی ہے ۔

´علی رضی اللہ عنہ کہتے ہیں کہ` مجھے رسول اللہ صلی اللہ علیہ وسلم نے منع فرمایا ، میں نہیں کہتا کہ تمہیں بھی منع فرمایا : سونے کی انگوٹھی پہننے سے ، ریشمی کپڑا پہننے سے ، سرخ اور چمکیلے لباس پہننے سے اور زرد رنگ کا لباس پہننے سے ، اور رکوع ( نیز سجدہ ) کی حالت میں قرآن پڑھنے سے ۔

´علی رضی اللہ عنہ کہتے ہیں کہ` مجھے رسول اللہ صلی اللہ علیہ وسلم نے رکوع کی حالت میں قرآن پڑھنے سے ، اور سونا اور زرد رنگ کا لباس پہننے سے منع فرمایا ۔

´علی رضی اللہ عنہ کہتے ہیں کہ` مجھے رسول اللہ صلی اللہ علیہ وسلم نے منع فرمایا ، میں یہ نہیں کہتا کہ تمہیں منع فرمایا : سونے کی انگوٹھی ، ریشمی کپڑے اور زرد رنگ کے کپڑے کے استعمال سے اور اس بات سے کہ میں رکوع میں قرآن پڑھوں ۔

´علی رضی اللہ عنہ کہتے ہیں کہ` مجھے رسول اللہ صلی اللہ علیہ وسلم نے سونے کی انگوٹھی پہننے ، زرد رنگ کا لباس پہننے اور ریشمی لباس پہننے سے اور رکوع میں قرآن پڑھنے سے منع فرمایا ۔

´علی رضی اللہ عنہ کہتے ہیں کہ` مجھے رسول اللہ صلی اللہ علیہ وسلم نے ریشمی کپڑے پہننے ، زرد رنگ کے لباس پہننے اور سونے کی انگوٹھی پہننے سے منع فرمایا ۔

´علی رضی اللہ عنہ کہتے ہیں کہ` مجھے رسول اللہ صلی اللہ علیہ وسلم نے چار باتوں سے منع فرمایا : سونے کی انگوٹھی پہننے ، ریشمی کپڑے پہننے ، اور رکوع کی حالت میں قرآن پڑھنے ، اور زرد رنگ کا لباس پہننے سے ۔ ( ابوعبدالرحمٰن نسائی کہتے ہیں ) ایوب نے عبیداللہ کی موافقت کی ہے مگر انہوں نے مولیٰ کا نام ذکر نہیں کیا ۔

´علی رضی اللہ عنہ کہتے ہیں کہ` رسول اللہ صلی اللہ علیہ وسلم نے زرد رنگ کے لباس ، ریشمی کپڑے اور سونے کی انگوٹھی پہننے اور رکوع میں قرآن پڑھنے سے منع فرمایا ۱؎ ۔