موطا امام مالك رواية يحييٰ

سیدنا عمر بن ابی سلمہ رضی اللہ عنہ سے روایت ہے کہ انہوں نے دیکھا رسول اللہ صلی اللہ علیہ وسلم کو نماز پڑھتے ہوئے ایک کپڑے میں، لپیٹے تھے آپ صلی اللہ علیہ وسلم اس کو اور دونوں کنارے اس کے دونوں کندھوں پر تھے، سیدہ اُم سلمہ رضی اللہ عنہا کے گھر میں۔

سیدنا ابوہریرہ رضی اللہ عنہ سے روایت ہے کہ ایک شخص نے پوچھا رسول اللہ صلی اللہ علیہ وسلم سے کہ نماز درست ہے ایک کپڑے میں؟ فرمایا آپ صلی اللہ علیہ وسلم نے: ”کیا تم میں سے ہر کسی کو دو کپڑے ملتے ہیں۔“

حضرت سعید بن مسیّب سے روایت ہے کہ پوچھے گئے سیدنا ابوہریرہ رضی اللہ عنہ ایک کپڑے میں نماز پڑھنے کے بارے میں؟ تو کہا انہوں نے: درست ہے۔ پس کہا گیا ان سے: کیا تم بھی ایسا کرتے ہو؟ جواب دیا: ہاں، میں ایک کپڑے میں نماز پڑھتا ہوں باوجود اس بات کے کہ میرے کپڑے تپائی پر رکھے ہوتے ہیں۔

امام مالک رحمہ اللہ کو پہنچا کہ سیدنا جابر بن عبداللہ انصاری رضی اللہ عنہ نماز پڑھتے تھے ایک کپڑے میں۔

حضرت ربیعہ بن عبدالرحمٰن سے روایت ہے کہ محمد بن عمرو بن حزم نماز پڑھتے تھے صرف کرتہ پہن کر۔

سیدنا جابر بن عبداللہ رضی اللہ عنہ سے روایت ہے کہ رسول اللہ صلی اللہ علیہ وسلم نے فرمایا: ”جو شخص نہ پائے دو کپڑے تو نماز پڑھے ایک کپڑا لپیٹ کر، اگر چھوٹا ہو تو اس کی تہبند کر لے۔“

امام مالک رحمہ اللہ نے فرمایا: جو شخص نماز پڑھے ایک قمیص میں تو اس کو چاہیے کہ اپنے مونڈھوں پر کوئی کپڑا ڈال لے۔