مسند الإمام الشافعي

ابن ابی اوفی رضی اللہ عنہ نے بیان فرمایا کہ رسول اللہ ﷺ نے سبز، سفید اور سرخ گھڑے میں نبیذ بنانے سے منع فرمایا۔

ابو ہریرہ رضی اللہ عنہ سے روایت ہے کہ رسول اللہ ﷺ نے فرمایا: ”کدو سے بنے ہوئے برتن اور روغنی برتن میں نبیذ نہ بناؤ۔“ (ابو سلمہ نے) کہا، پھر ابو ہریرہ رضی اللہ عنہ فرماتے تھے: تم سبز روغنی گھڑوں اور لکڑی کو کھود کر بنائے گئے برتنوں سے بھی اجتناب کرو۔

زہری فرماتے ہیں کہ میں نے انس رضی اللہ عنہ کو فرماتے ہوئے سنا کہ رسول اللہ ﷺ نے کدو سے بنے ہوئے برتن اور روغنی گھڑے میں نبیذ بنانے سے منع فرمایا۔

ابن عمر رضی اللہ عنہما سے روایت ہے کہ رسول اللہ ﷺ نے کسی غزوہ میں لوگوں کو خطبہ دیا، عبداللہ بن عمر رضی اللہ عنہما نے فرمایا: میں آپ کی طرف متوجہ ہوا اور میرے پہنچنے سے پہلے ہی آپ ﷺ واپس تشریف لے گئے، میں نے صحابہ کرام رضی اللہ عنہم سے پوچھا کہ آپ نے کیا فرمایا؟ تو انہوں نے کہا کہ آپ ﷺ نے کدو سے بنے ہوئے برتن اور روغنی گھڑے میں نبیذ بنانے سے منع فرمایا۔

ابوہریرہ رضی اللہ عنہ سے روایت ہے کہ رسول اللہ ﷺ نے کدو سے بنے برتن اور سبز روغنی گھڑے میں نبیذ بنانے سے منع فرمایا۔

عبداللہ بن عمرو بن عاص رضی اللہ عنہما نے بیان فرمایا کہ جب رسول اللہ ﷺ نے چند برتنوں (میں نبیذ) سے منع فرمایا تو آپ ﷺ سے کہا گیا، ہر آدمی کے پاس مشکیزہ نہیں ہے۔ پھر آپ ﷺ نے سبز روغنی گھڑے کے علاوہ اور گھڑوں (میں نبیذ بنانے) کی اجازت دے دی۔

جابر رضی اللہ عنہ سے روایت ہے کہ نبی ﷺ کے لیے نبیذ مشکیزے میں بھگوئی جاتی تھی، اگر وہ دستیاب نہ ہوتا تو پتھر سے بنے ہوئے پانی پینے کے برتن میں بھگوئی جاتی۔