مسند الإمام الشافعي

سعید بن مسیب رحمہ اللہ سے روایت ہے کہ محمد بن مسلمہ کی بیٹی، رافع بن خدیج رضی اللہ عنہ کے نکاح میں تھیں، وہ بڑھاپے یا کسی اور وجہ سے انہیں ناپسند کرنے لگے تھے۔ جب انہوں نے طلاق کا ارادہ کیا تو بیوی نے کہا: ”مجھے طلاق نہ دیں، مجھے اپنے پاس روکے رکھیں اور میرے حقِ باری کے بارے میں جو چاہیں فیصلہ کریں“۔ تب اللہ تعالیٰ نے یہ آیت نازل فرمائی: ”اور اگر کوئی عورت اپنے خاوند کی بے تعلقی سے ڈرے“۔

ابن ابی ملیکہ بیان کرتے ہیں کہ عقیل بن ابی طالب رضی اللہ عنہ نے فاطمہ بنت عقبہ سے شادی کی، تو فاطمہ نے ان سے کہا: ”آپ میرے پاس ہی رہیں اور میں آپ پر خرچ بھی کروں گی“۔ وہ جب بھی ان کے پاس آتے تو وہ (فاطمہ) کہتی تھیں: ”عتبہ اور شیبہ کہاں ہیں؟“ تو وہ (یہ سن کر) خاموش ہو جاتے۔ ایک دن وہ اکتائے ہوئے گھر میں داخل ہوئے تو فاطمہ نے کہا: ”عتبہ بن ربیعہ اور شیبہ بن ربیعہ کہاں ہیں؟“ عقیل رضی اللہ عنہ نے غصے میں کہا: ”جب تو جہنم میں جائے گی تو وہ تیرے بائیں جانب ہوں گے“۔ (یہ بات اس پر سخت گراں گزری) تو اس نے کپڑے باندھے اور عثمان بن عفان رضی اللہ عنہ کے پاس آگئی اور ان سے یہ ساری بات بیان کی۔ عثمان رضی اللہ عنہ نے ابن عباس اور معاویہ رضی اللہ عنہما کو (فیصلے کے لیے) بھیجا۔ ابن عباس رضی اللہ عنہما نے کہا: ”میں ضرور ان کے درمیان علیحدگی کرواؤں گا“، اور معاویہ رضی اللہ عنہ نے فرمایا: ”میں بنی عبد مناف کے دو بزرگوں کے درمیان علیحدگی نہیں ہونے دوں گا“۔ ابن ابی ملیکہ نے کہا کہ وہ دونوں ان کے پاس آئے تو ان کو سخت غصے میں پایا، پھر ان دونوں نے ان کے مابین صلح کروا دی۔

عبیدہ رحمہ اللہ سے روایت ہے وہ اس آیت: ”اگر تمہیں میاں بیوی کی آپس کی ناچاکی کا خوف ہو تو ایک منصف مرد کے گھر والوں سے اور ایک منصف عورت کے گھر والوں کی طرف سے بھیجو“ (النساء : 35) کے متعلق فرماتے ہیں کہ علی رضی اللہ عنہ کے پاس (ان کے عہدِ خلافت میں) ایک میاں بیوی اپنی برادری کے لوگوں کے ساتھ آئے۔ علی رضی اللہ عنہ نے ان کو حکم دیا کہ وہ ایک منصف مرد کے گھر والوں سے اور ایک منصف عورت کے گھر والوں سے بھیجیں۔ پھر آپ رضی اللہ عنہ نے دونوں منصفوں سے کہا: ”کیا تم جانتے ہو تمہارا کام کیا ہے؟ اگر تم مناسب سمجھو تو دونوں میں اتفاق کرا دو اور اگر چاہو تو دونوں کو الگ الگ کرا دو“۔ یہ سن کر عورت نے کہا: ”میں اللہ کی کتاب کے فیصلے پر راضی ہوں خواہ ملاپ کی صورت میں ہو یا جدائی کی صورت میں“، اور آدمی نے کہا: ”مجھے جدائی منظور نہیں ہے“۔ اس پر علی رضی اللہ عنہ نے فرمایا: ”اللہ کی قسم! تو جھوٹا ہے، تجھے بھی دونوں صورتیں اسی طرح منظور کرنی پڑیں گی“۔

سعید بن مسیب رحمہ اللہ نے بیان کیا کہ محمد بن مسلمہ کی بیٹی، رافع بن خدیج رضی اللہ عنہ کے نکاح میں تھیں، وہ بڑھاپے یا کسی اور وجہ سے انہیں ناپسند کرنے لگے تھے، یہاں تک کہ انہوں نے طلاق دینے کا ارادہ کر لیا۔ تب انہوں نے کہا: ”مجھے طلاق نہ دیں، میں اپنے حقوق سے دستبردار ہوتی ہوں“۔ اس پر یہ آیت نازل ہوئی: ”اور اگر کوئی عورت اپنے خاوند کی بے تعلقی یا بے رخی سے ڈرے“ (النساء : 128)۔ فرمایا: پھر یہی طریقہ رائج ہو گیا۔