مسند الإمام الشافعي

ام حبیبہ بنت ابوسفیان رضی اللہ عنہا سے روایت ہے، انہوں نے فرمایا: ”اے اللہ کے رسول ﷺ! کیا آپ کو میری بہن، ابوسفیان کی بیٹی میں کوئی دلچسپی ہے؟“ تو رسول اللہ ﷺ نے فرمایا: ”میں کیا کرنے والا ہوں؟“ ام حبیبہ رضی اللہ عنہا نے کہا: ”آپ اس سے نکاح کر لیں“۔ آپ ﷺ نے فرمایا: ”تیری بہن سے!“ انہوں نے کہا: ”ہاں“۔ آپ ﷺ نے فرمایا: ”کیا تم یہ پسند کرو گی؟“ (کہ تمہاری بہن تمہاری سوکن ہو) انہوں نے کہا: ”ہاں، میں آپ کے پاس اکیلی تو نہیں ہوں اور میں خیر و برکت میں اپنی بہن کو اپنا شریک بنانا پسند کرتی ہوں“۔ آپ ﷺ نے فرمایا: ”یہ میرے لیے حلال نہیں ہے“۔ ام حبیبہ رضی اللہ عنہا کہتی ہیں میں نے کہا: ”اللہ کی قسم! مجھے اطلاع ملی ہے کہ آپ ابوسلمہ کی بیٹی سے نکاح کرنے والے ہیں“۔ آپ ﷺ نے فرمایا: ”ابوسلمہ کی بیٹی؟“ انہوں نے کہا: ”ہاں“۔ آپ ﷺ نے فرمایا: ”اللہ کی قسم! اگر وہ میری ربیبہ اور زیرِ پرورش نہ ہوتی تو تب بھی حلال نہ ہوتی، کیونکہ وہ میرے رضاعی بھائی کی بیٹی ہے، مجھے اور اس کے باپ کو ثویبہ نے دودھ پلایا ہے، لہٰذا تم اپنی بیٹیوں اور بہنوں کو مجھ سے نکاح کے لیے پیش نہ کرو۔“

عائشہ رضی اللہ عنہا سے روایت ہے کہ رسول اللہ ﷺ نے فرمایا: ”رضاعت سے بھی وہ رشتہ حرام ہو جاتا ہے جو نسب سے حرام ہیں۔“

علی رضی اللہ عنہ سے روایت ہے انہوں نے فرمایا: ”اے اللہ کے رسول ﷺ! کیا آپ کے لیے اپنے چچا حمزہ رضی اللہ عنہ کی بیٹی میں کوئی رغبت نہیں، وہ قریش کی سب سے خوبصورت نوجوان لڑکی ہے؟“ تو آپ ﷺ نے فرمایا: ”کیا آپ کو علم نہیں کہ حمزہ رضی اللہ عنہ میرے رضاعی بھائی بھی ہیں، اور اللہ تعالیٰ نے رضاعت سے بھی وہ رشتے حرام کر دیے ہیں جو نسب سے حرام کیے ہیں۔“

عائشہ رضی اللہ عنہا کے واسطہ سے ایک اور سند سے نبی ﷺ سے حمزہ رضی اللہ عنہ کی بیٹی کے متعلق سفیان کی حدیث کی مثل مروی ہے۔

عمرو بن شرید سے روایت ہے کہ ابن عباس رضی اللہ عنہما سے دریافت کیا گیا کہ: ”ایک شخص کے پاس دو بیویاں ہیں۔ ان میں سے ایک نے کسی کے لڑکے کو دودھ پلایا، اور دوسری نے کسی اور کی لڑکی کو، تو کیا اس لڑکے اور لڑکی کا نکاح درست ہے؟“ فرمایا: ”نہیں۔ کیونکہ دونوں میں مادہ منویہ ڈالنے والا مرد تو ایک ہی ہے (جس سے دونوں عورتوں کا دودھ بنا ہے)۔“

عمرہ بنت عبدالرحمن سے روایت ہے کہ نبی ﷺ کی بیوی عائشہ رضی اللہ عنہا نے انہیں بتایا کہ نبی ﷺ ان کے ہاں تشریف فرما تھے کہ انہوں نے ایک آدمی کی آواز سنی جو حفصہ رضی اللہ عنہا سے اجازت طلب کر رہا تھا۔ عائشہ رضی اللہ عنہا کہتی ہیں میں نے کہا: ”اے اللہ کے رسول ﷺ! یہ آدمی آپ کے گھر میں داخل ہونے کی اجازت مانگ رہا ہے“۔ تو رسول اللہ ﷺ نے فرمایا: ”میرے خیال میں یہ فلاں آدمی ہے“ (حفصہ کے رضاعی چچا کا نام لیا)۔ تو میں نے پوچھا: ”کیا فلاں، جو ان کے رضاعی چچا تھے، اگر زندہ ہوتے تو میرے یہاں آجا سکتے تھے؟“ رسول اللہ ﷺ نے فرمایا: ”ہاں، جیسے خون ملنے سے حرمت ہوتی ہے ویسے ہی دودھ پینے سے بھی حرمت ثابت ہو جاتی ہے۔“

عائشہ رضی اللہ عنہا سے روایت ہے، فرمایا کہ: ”میرا (رضاعی) چچا افلح آیا“ اور لمبی حدیث بیان کی۔