مسند الإمام الشافعي

انس بن مالک رضی اللہ عنہ سے روایت ہے کہ جب رسول اللہ ﷺ مدینہ تشریف لائے تو آپ ﷺ نے لوگوں کی رہائش گاہوں کے لیے قرعہ اندازی فرمائی، عبدالرحمن بن عوف رضی اللہ عنہ کا قرعہ سعد بن ربیع رضی اللہ عنہ کے نام نکلا۔ تو سعد رضی اللہ عنہ نے ان سے کہا: ”آپ آئیں میں آپ کے لیے اپنا مال تقسیم کروں، اور میں آپ کے لیے اپنی دو بیویوں میں سے جس کو آپ چاہتے ہیں (اس سے علیحدہ ہو کر) آپ کے لیے چھوڑ دیتا ہوں، اور آپ کے لیے مزدوری بھی کروں گا۔“ عبدالرحمن رضی اللہ عنہ نے اس کے جواب میں کہا: ”اللہ تعالیٰ آپ کے اہل اور مال میں برکت عطا فرمائے، مجھے بازار کا راستہ بتا دیجیے۔“ آپ رضی اللہ عنہ بازار نکل گئے اور کچھ مال کمایا، پھر ایک عورت کو منگنی کا پیغام بھیجا اور اس سے شادی کر لی۔ تو رسول اللہ ﷺ نے انہیں کہا: ”اے عبدالرحمن! کتنے مہر پر تو نے اس سے شادی کی؟“ عبدالرحمن رضی اللہ عنہ نے کہا: ”سونے کی ایک گٹھلی پر۔“ آپ ﷺ نے فرمایا: ”ولیمہ کر، اگرچہ ایک بکری ہی کا ہو۔“

انس بن مالک رضی اللہ عنہ سے روایت ہے کہ عبدالرحمن بن عوف رضی اللہ عنہ نبی ﷺ کی طرف آئے تو ان کے (کپڑے یا جسم) پر زرد رنگ کا نشان تھا، رسول اللہ ﷺ نے دریافت کیا تو انہوں نے بتایا کہ انہوں نے انصار کی ایک عورت سے شادی کر لی ہے۔ اس پر رسول اللہ ﷺ نے فرمایا: ”کتنا مہر دیا ہے؟“ انہوں نے کہا: ”ایک گٹھلی کے برابر سونا دیا ہے۔“ پھر رسول اللہ ﷺ نے انہیں فرمایا: ”اچھا، تو ولیمہ کر خواہ ایک بکری ہی کا ہو۔“

انس رضی اللہ عنہ سے روایت ہے کہ عبدالرحمن بن عوف رضی اللہ عنہ نے ایک گٹھلی کے وزن کے برابر سونے پر شادی کی۔