مسند الإمام الشافعي

عطاء سے روایت ہے انہوں نے ابن عباس رضی اللہ عنہما سے سنا وہ کہتے ہیں، بجو میں مینڈھا فدیہ ہے۔

عکرمہ - ابن عباس رضی اللہ عنہما کے آزاد کردہ غلام - بیان فرماتے ہیں کہ رسول اللہ ﷺ نے بجو کو چھوٹے نیزے سے شکار کیا، اور اس کے فدیہ میں ایک مینڈھے کا فیصلہ دیا۔

جابر بن عبد اللہ رضی اللہ عنہما سے روایت ہے کہ عمر بن خطاب رضی اللہ عنہ نے ہرن کے چھوٹے بچے کے شکار کی صورت میں بکری کے فدیہ کا فیصلہ دیا۔

جابر رضی اللہ عنہ سے روایت ہے کہ عمر رضی اللہ عنہ نے خرگوش میں ایک سال کا بھیڑ یا بکری کا بچہ دینے اور یربوع کے قتل میں چار ماہ کا بکری کا بچہ بطور فدیہ دینے کا فیصلہ کیا۔

طارق بن شہاب سے روایت ہے فرمایا: ”ہم حج کے لیے نکلے تو ہم میں سے ایک آدمی جس کا نام اربد تھا نے ایک ہرن کا شکار کیا اور اس کی پیٹھ پر زخم کر دیا۔ ہم عمر رضی اللہ عنہ کے پاس آئے تو آپ رضی اللہ عنہ سے اربد نے دریافت کیا تو انہوں نے فرمایا: اربد تو خود اس میں فیصلہ کر (کہ تجھے کیا فدیہ دینا ہے) اس نے کہا: اے امیر المومنین! آپ مجھ سے بہتر اور زیادہ علم والے ہیں۔ عمر رضی اللہ عنہ نے اسے کہا: میں تجھے حکم دیتا ہوں کہ تو اس میں فیصلہ کر، میں نے تجھے یہ حکم نہیں دیا کہ میری صفات بیان کر، تو اربد نے کہا: میرے خیال میں اس کا فدیہ ایک ایسی بکری ہے جو چرنے کے قابل ہو۔ عمر رضی اللہ عنہ نے فرمایا (تصدیق کرتے ہوئے): یہی ہے اس کا فدیہ۔“

جابر بن عبد اللہ رضی اللہ عنہما سے روایت ہے کہ عمر بن خطاب رضی اللہ عنہ نے بجو میں مینڈھے، ہرن کے چھوٹے بچے میں بکری، خرگوش میں ایک سال کا بھیڑ یا بکری کا بچہ اور یربوع میں چار ماہ کا بکری کا بچہ بطور فدیہ دینے کا فیصلہ صادر فرمایا۔

عبد اللہ بن مسعود رضی اللہ عنہ سے روایت ہے کہ انہوں نے یربوع میں بکری کا چار ماہ کا بچہ دینے کا فیصلہ کیا۔

ابو سفر سے روایت ہے کہ عثمان بن عفان رضی اللہ عنہ نے گرگٹ کے مشابہ ایک جانور کے قتل میں بکریوں سے ایک بچہ بطور فدیہ دینے کا فیصلہ فرمایا۔