مسند الإمام الشافعي

ابن عمر رضی اللہ عنہ سے روایت ہے بیان فرماتے ہیں کہ مدینہ میں مدینہ والوں میں سے ایک آدمی مسجد میں کھڑا ہوا اور اس نے کہا، اے اللہ کے رسول صلی اللہ علیہ وسلم! آپ ہمیں کہاں سے احرام باندھنے کا حکم دیتے ہیں؟ آپ صلی اللہ علیہ وسلم نے فرمایا: ”مدینہ کے لوگ ذوالحلیفہ سے احرام باندھیں، شام کے لوگ جحفہ سے اور نجد کے لوگ قرن (منازل) سے احرام باندھیں“۔ ابن جریج رحمہ اللہ کہتے ہیں مجھ سے نافع رحمہ اللہ نے کہا وہ یہ بھی سمجھتے ہیں کہ نبی صلی اللہ علیہ وسلم نے فرمایا : ”اور یمن والے یلملم سے احرام باندھیں“۔

عبد اللہ بن عمر رضی اللہ عنہ سے روایت ہے کہ رسول اللہ صلی اللہ علیہ وسلم نے فرمایا: ”مدینہ کے لوگ ذوالحلیفہ سے احرام باندھیں، شام کے لوگ جحفہ سے اور نجد کے لوگ قرن (منازل) سے احرام باندھیں“۔ ابن عمر رضی اللہ عنہ نے فرمایا، وہ (صحابہ رضی اللہ عنہم) یہ سمجھتے ہیں کہ رسول اللہ صلی اللہ علیہ وسلم نے فرمایا: ”اور یمن والے یلملم سے احرام باندھیں“۔

عبد اللہ بن عمر رضی اللہ عنہ سے مروی ہے انہوں نے فرمایا مدینہ والوں کو حکم دیا گیا کہ وہ ذوالحلیفہ سے احرام باندھیں، اور شام والے جحفہ سے اور نجد والے قرن (منازل) سے احرام باندھیں۔ ابن عمر رضی اللہ عنہ نے فرمایا: یہ تین وہ مقامات ہیں جو میں نے رسول اللہ صلی اللہ علیہ وسلم سے خود سنے اور مجھے بتایا گیا ہے کہ رسول اللہ صلی اللہ علیہ وسلم نے فرمایا: ”اور یمن والے یلملم سے احرام باندھیں“۔

طاؤوس بیان کرتے ہیں کہ رسول اللہ صلی اللہ علیہ وسلم نے مدینہ والوں کے لیے ذوالحلیفہ، شام والوں کے لیے جحفہ، نجد والوں کے لیے قرن منازل، اور یمن والوں کے لیے یلملم میقات مقرر کیے، پھر فرمایا: ”یہ وہاں کے رہنے والوں، اس جگہ پر آنے والوں جو وہاں کے رہائشی نہیں اور حج یا عمرہ کا ارادہ لے کر آئے ہیں ان کے لیے احرام باندھنے کی جگہ ہے۔ لیکن جن کا قیام میقات اور مکہ کے درمیان ہے تو وہ احرام اسی جگہ سے باندھیں جہاں سے انہوں نے سفر شروع کرنا ہے یہاں تک کہ مکہ والے مکہ سے ہی احرام باندھ لیں۔“

ابن عباس رضی اللہ عنہ کے واسطہ سے نبی صلی اللہ علیہ وسلم سے احرام باندھنے کی جگہوں کے بارے میں اسی طرح مروی ہے جس طرح سفیان رضی اللہ عنہ کی حدیث میقاتوں کے متعلق ہے۔

ابن عباس رضی اللہ عنہ سے روایت ہے بیان فرماتے ہیں کہ رسول اللہ صلی اللہ علیہ وسلم نے مدینہ والوں کے لیے ذوالحلیفہ، شام والوں کے لیے جحفہ، یمن والوں کے لیے یلملم اور نجد والوں کے لیے قرن (منازل) کو میقات مقرر کیا، اور جن کا قیام میقات اور مکہ کے درمیان ہے تو وہ احرام وہیں سے باندھیں جہاں سے وہ سفر شروع کریں۔

ابو الزبير سے روایت ہے کہ انہوں نے جابر بن عبد اللہ رضی اللہ عنہ سے سنا جب ان سے احرام باندھنے کی جگہ کے متعلق پوچھا گیا تو انہوں نے فرمایا: ”میں نے اس کو سنا، پھر خاموش ہو گئے میرے خیال سے وہ نبی صلی اللہ علیہ وسلم کے متعلق فرما رہے تھے کہ آپ صلی اللہ علیہ وسلم نے فرمایا: ”مدینہ والے ذوالحلیفہ سے احرام باندھیں گے اور دوسرے راستے سے آنے والے جحفہ سے، اور احرام باندھیں گے، عراق والے ذات عرق سے، اور نجد والے قرن منازل سے اور یمن والے یلملم سے احرام باندھیں گے“۔

عطاء رحمہ اللہ بیان کرتے ہیں کہ رسول اللہ صلی اللہ علیہ وسلم نے مدینہ والوں کے لیے ذوالحلیفہ میقات مقرر کیا، مغرب والوں کے لیے جحفہ، مشرق والوں کے لیے ذات عرق، نجد والوں کے لیے قرن، اور جس نے یمن والوں میں سے یا ان کے علاوہ دوسروں نے نجد کا راستہ اختیار کیا ان کے لیے قرن ذوالمعادن اور یمن والوں کے لیے یلملم۔

ابن جریج رحمہ اللہ کہتے ہیں میں نے عطاء رحمہ اللہ سے مراجعت کی اور میں نے کہا لوگ سمجھتے ہیں کہ نبی صلی اللہ علیہ وسلم نے ذات عرق کو میقات مقرر نہیں کیا اور نہ ہی اس وقت مشرق والے تھے۔ عطاء نے کہا اس وقت عراق نہیں تھا اور لیکن مشرق والے تھے۔ عطاء نے کہا ہم نے اسی طرح سنا ہے کہ آپ صلی اللہ علیہ وسلم نے ذات عرق یا عقیق کو مشرق والوں کے لیے احرام باندھنے کی جگہ مقرر کیا۔ اور فرمایا: اس وقت عراق نہیں تھا اور لیکن مشرق والے تھے۔ انہوں نے اس بات کی نسبت نبی صلی اللہ علیہ وسلم کے علاوہ صحابہ رضی اللہ عنہم میں سے کسی سے نہیں کی لیکن وہ اس بات کا انکار کرتے ہیں (کہ نبی صلی اللہ علیہ وسلم نے میقات مقرر نہیں کیا) مگر یہ (کہتے ہیں) کہ اس کو نبی صلی اللہ علیہ وسلم نے میقات مقرر کیا۔

طاؤوس رحمہ اللہ سے روایت ہے وہ کہتے ہیں کہ رسول اللہ صلی اللہ علیہ وسلم نے ذات عرق کو میقات مقرر نہیں کیا اور نہ ہی اس وقت مشرق والے تھے۔ بلکہ یہ لوگوں نے ذات عرق میقات مقرر کیا ہے۔ امام شافعی رحمہ اللہ نے فرمایا: میرے خیال میں بھی بات اسی طرح ہے جس طرح طاؤوس رحمہ اللہ نے کہی اور بہتر علم اللہ کے پاس ہے۔

ابو الشعثاء کہتے ہیں رسول اللہ صلی اللہ علیہ وسلم نے مشرق والوں کے لیے کوئی بھی میقات مقرر نہیں کیا یہ تو لوگوں نے قرن کے حساب سے ذات عرق مقرر کر دیا۔