مسند الإمام الشافعي

ابن عباس رضی اللہ عنہما سے روایت ہے وہ بیان فرماتے ہیں: ”کیا میں تمہیں رسول اللہ ﷺ کی سفر کی نماز کے متعلق نہ بتاؤں؟ آپ گھر میں ہوتے اور سورج ڈھل جاتا تو ظہر اور عصر کو زوال کے وقت جمع کر لیتے، اور اگر سورج کے زوال سے قبل سفر کرتے تو ظہر کو لیٹ کرتے یہاں تک کہ ظہر اور عصر کو عصر کے وقت میں جمع کر لیتے۔“ کریب رحمہ اللہ کہتے ہیں آپ نے میرے خیال کے مطابق مغرب اور عشاء کے متعلق بھی اسی طرح کہا۔

معاذ بن جبل رضی اللہ عنہ بیان فرماتے ہیں کہ وہ رسول اللہ ﷺ کے ساتھ تبوک والے سال (سفر میں) نکلے۔ اور رسول اللہ ﷺ ظہر، عصر اور مغرب، عشاء کو جمع کر لیتے۔ فرمایا: ”ایک دن نماز لیٹ کی پھر نکلے اور ظہر، عصر پڑھی۔ پھر آئے اور بعد میں پھر (سفر کو) نکلے تو مغرب اور عشاء اکٹھی پڑھی۔“ [فوائد: 1. دورانِ سفر دو نمازیں جمع کر کے پڑھنا جائز ہے۔ 2. دورانِ سفر نمازوں میں تقدیم و تاخیر یعنی ظہر کو عصر کے وقت میں اور مغرب کو عشاء کے وقت میں یا عصر کو ظہر کے وقت اور عشاء کو مغرب کے وقت میں پڑھنا جائز ہے۔ 3. غزوہ تبوک شام کے عیسائیوں کے خلاف تھا جو مسلمانوں پر حملہ کرنا چاہتے تھے۔ یہ غزوہ رجب 9 ہجری میں ہوا اس میں مسلمانوں کی تعداد تیس ہزار تھی اس کو غزوۃ العسرۃ (تنگی کی جنگ) بھی کہا جاتا ہے۔ 4. معلوم ہوا خلیفہ بذات خود فوج کی کمانڈ کر سکتا ہے۔]

اسماعیل بن عبدالرحمن بن ابی ذئب الاسدی سے روایت ہے وہ بیان کرتے ہیں کہ ہم ابن عمر رضی اللہ عنہما کے ساتھ جماء مقام کی طرف گئے، سورج غروب ہو گیا، ہم انہیں یہ کہنے سے ڈر رہے تھے کہ سواریوں سے اتریں تاکہ نماز پڑھ لیں، جب آسمان کی سفیدی غائب ہو گئی اور رات کی ابتدائی سیاہی آ گئی، تو وہ سواری سے اترے اور تین رکعات نماز پڑھی پھر سلام پھیرا، پھر دو رکعتیں پڑھیں اور سلام پھیرا، پھر ہمیں مخاطب کر کے فرمایا: ”میں نے دیکھا رسول اللہ ﷺ نے اس طرح کیا۔“

عبداللہ بن عمر رضی اللہ عنہما سے روایت ہے وہ بیان کرتے ہیں کہ نبی ﷺ کو جب سفر کے لیے جلدی چلنا ہوتا تو آپ ﷺ مغرب اور عشاء جمع کر لیتے۔

ابن عمر رضی اللہ عنہما فرماتے ہیں کہ نبی ﷺ کو جب سفر کے لیے جلدی جانا ہوتا تو آپ عشاء اور مغرب جمع کر لیتے۔

معاذ بن جبل رضی اللہ عنہ سے روایت ہے کہ رسول اللہ ﷺ ظہر، عصر اور مغرب، عشاء کو اپنے تبوک کے سفر میں جمع کرتے تھے۔