مسند الإمام الشافعي

عائشہ رضی اللہ عنہا سے روایت ہے وہ بیان فرماتی ہیں کہ رسول اللہ ﷺ نے سفر میں نماز قصر بھی کی اور مکمل بھی پڑھی۔

عائشہ رضی اللہ عنہا سے مروی ہے، انہوں نے فرمایا: پہلے نماز دو دو رکعتیں فرض کی گئی، حالتِ اقامت کی نمازوں میں زیادتی کر دی گئی اور سفر کی نماز اپنی حالت پر باقی رکھی گئی۔ زہری رحمہ اللہ کہتے ہیں میں نے پوچھا تو پھر خود عائشہ رضی اللہ عنہا سفر میں کیوں پوری پڑھتی تھیں؟ عروہ نے جواب دیا کہ جو تاویل عثمان رضی اللہ عنہ نے کی تھی وہی انہوں نے بھی کر لی۔

ابن عمر رضی اللہ عنہما سے مروی ہے کہ وہ جب منیٰ میں امام کے پیچھے پڑھتے تو چار (فرض) پڑھتے اور جب خود پڑھتے تو دو رکعتیں پڑھتے تھے۔

ابن عمر رضی اللہ عنہما سے روایت ہے کہ وہ سفر میں فرضی نماز کے ساتھ پہلے یا بعد میں کچھ نہیں پڑھتے تھے، مگر یہ کہ تہجد کی نماز۔