مسند الإمام الشافعي

سعيد بن المسیب رحمہ اللہ سے روایت ہے کہ ابوموسیٰ اشعری رضی اللہ عنہ ام المؤمنین عائشہ رضی اللہ عنہا کے پاس آئے اور کہا: ”مجھ پر محمد ﷺ کے صحابہ کا اختلاف ایک ایسے مسئلہ میں گراں ہو چکا ہے جس کو میں بڑا جانتا ہوں کہ آپ کے سامنے رکھوں۔“ عائشہ رضی اللہ عنہا نے فرمایا: ”وہ کیا مسئلہ ہے؟ جس کے بارے میں تو اپنی ماں سے سوال نہیں کرنا چاہتا، مجھ سے دریافت کرو!“ تو ابوموسیٰ اشعری رضی اللہ عنہ نے عائشہ رضی اللہ عنہا سے کہا: ”ایک آدمی اپنی بیوی کے پاس جاتا ہے اور وہ انزال سے قبل دور ہو جاتا ہے۔“ عائشہ رضی اللہ عنہا نے فرمایا: ”جب ختنہ، ختنہ سے تجاوز کر جائے تو غسل واجب ہو جاتا ہے۔“ ابوموسیٰ رضی اللہ عنہ نے کہا: ”میں آپ کے بعد کسی سے (اس مسئلہ میں) کبھی بھی سوال نہ کروں گا۔“

سعيد بن مسیب رحمہ اللہ سے روایت ہے کہ ابوموسیٰ اشعری رضی اللہ عنہ نے عائشہ رضی اللہ عنہا سے دو ختنوں کے ملنے کے بارے میں سوال کیا تو عائشہ رضی اللہ عنہا نے فرمایا کہ رسول اللہ ﷺ نے فرمایا: ”جب دو ختنے (شرمگاہیں) مل جائیں یا ختنہ ختنے کو چھو لے، تو غسل واجب ہو گیا۔“

عائشہ رضی اللہ عنہا سے روایت ہے، فرماتی ہیں نبی ﷺ نے فرمایا: ”جب تم میں سے کوئی چار شاخوں کے درمیان بیٹھا، پھر اس نے عضوِ مخصوص کو عورت کی شرم گاہ سے ملایا، تو اس پر غسل واجب ہو گیا۔“

عائشہ رضی اللہ عنہا سے روایت ہے، فرماتی ہیں: جب دو ختنے مل جائیں تو غسل واجب ہو جاتا ہے۔ میں نے اور نبی ﷺ نے یہ عمل کیا اور (بعد میں) ہم نے غسل کیا۔