مسند الحميدي

83- سیدنا سعید بن زید رضی اللہ عنہ روایت کرتے ہیں، نبی اکرم صلی اللہ علیہ وسلم نے ارشاد فرمایا ہے: ”جو شخص ایک بالشت کے برابر زمین ظلم کے طور پر ہتھیالے گا اسے سات زمینوں جتنا وزنی طوق (قیامت کے دن) پہنایا جائے گا اور جو شخص اپنے مال کی حفاظت کرتے ہوئے مارا جائے وہ شہید ہے۔“ [مسند الحمیدی/حدیث نمبر:83]

فائدہ:
اس حدیث میں ظلم کی ایک قسم کا بیان ہے کہ جس نے کسی کی زمین پر ناجائز قبضہ کیا، وہ زمین خواہ ایک بالشت کے برابر ہی کیوں نہ ہو، حرام ہے۔ اس کے بدلے میں روز قیامت ہتھیانے والے کے گریبان میں سات زمینوں کا طوق ڈالا جائے گا۔ کس قدر یہ سنگین جرم ہے، اور کس قدر ذلت آمیز فعل ہے کہ قیامت کے دن پوری انسانیت کے سامنے زمینیں اس کے گریبان میں ہوں گی، اور وہ کیسے چلے گا؟ اس قدر زیادہ بوجھ کیسے اٹھائے گا؟ جہنم میں جانے سے پہلے کس قدر بڑا عذاب اس کو دیا گیا ہے۔ اس میں ہر انسان کے لیے عبرت ہے کہ ایک پائی بھی ناجائز حاصل نہ کرے، ہر معاملے میں تقویٰ اختیار کرے، قرآن و حدیث کو لازم پکڑے اور علماء کے قریب بیٹھ کر علم وحی سیکھے تاکہ آخرت کے عذابوں سے محفوظ رہ سکے۔ اس حدیث سے یہ بھی ثابت ہوا کہ جو شخص اپنے مال کی حفاظت کرتا ہوا قتل ہو گیا، وہ شہید ہے۔ یہ بات معلوم شدہ ہے کہ عزت، مال اور جان کی حفاظت کرنا فرض ہے۔ ان پر اگر کوئی حملہ کر دے تو اس کا دفاع بھی ضروری ہے۔ جب مال پر حملہ آور ہونے والے کے ساتھ لڑنا جائز ہے تو عزت اور جان پر حملہ آور ہونے والے کے خلاف لڑنا بالاولیٰ ضروری ہے۔ اس صورت میں شہید ہونے والے کا درجہ راہ جہاد میں شہید ہونے والے شخص سے کم ہے۔ اس کو با قاعدہ کفن اور غسل دیا جائے گا، جبکہ معرکے میں شہید ہونے والے کو کفن اور غسل نہیں دیا جائے گا۔