صحيح مسلم

نبی کریم صلی اللہ علیہ وسلم کے مولیٰ ثوبان رضی اللہ عنہ سے روایت ہے کہ میں رسول اللہ صلی اللہ علیہ وسلم کے پاس کھڑا ہوا تھا تو ایک یہودی عالم، آپ صلی اللہ علیہ وسلم کے پاس آیا اور کہا: «السَّلَامُ عَلَيْكَ يَا مُحَمَّدُ» ”اے محمد! تم پر سلامتی ہو“، میں نے اس کو اس قدر زور سے دھکا دیا کہ وہ گرتے گرتے بچا تو اس نے کہا، مجھے دھکا کیوں دیتے ہو؟ میں نے کہا: تو «يَا رَسُولَ اللَّهِ» ”اے اللہ کے رسول!“ کیوں نہیں کہتا؟ یہودی نے کہا، ہم تو آپ کو اس نام سے پکارتے ہیں جو آپ کے گھر والوں نے آپ کا رکھا ہے، تو رسول اللہ صلی اللہ علیہ وسلم نے فرمایا: ”میرا نام محمد ہے، جو میرے گھر والوں نے رکھا ہے“، یہودی بولا، میں آپ سے پوچھنے آیا ہوں، رسول اللہ صلی اللہ علیہ وسلم نے اسے فرمایا: ”کیا اگر میں تمہیں کچھ بتاؤں تو تجھے اس سے فائدہ ہو گا؟“ اس نے کہا، میں اپنے دونوں کانوں سے سنوں گا (یعنی توجہ سے سنوں گا) تو رسول اللہ صلی اللہ علیہ وسلم نے ایک چھڑی سے جو آپ صلی اللہ علیہ وسلم کے پاس تھی، زمین پر لکیر کھینچی اور فرمایا: ”پوچھ“، یہودی نے کہا، ﴿یَوْمَ تُبَدَّلُ الْأَرْضُ غَیْرَ الْأَرْضِ وَالسَّمَاوَاتُ﴾ [سورة إبراهيم: 48] ”جس وقت زمین و آسمان دوسری زمین اور آسمان سے بدل دیے جائیں گے“ تو لوگ اس وقت کہاں ہوں گے؟ رسول اللہ صلی اللہ علیہ وسلم نے فرمایا: ”وہ پل صراط کے قریب اندھیروں میں ہوں گے“، اس نے کہا، سب سے پہلے کون لوگ گزریں گے؟ آپ صلی اللہ علیہ وسلم نے فرمایا: ”فقیر مہاجرین“، یہودی نے کہا، ان کو کیا تحفہ ملے گا جب وہ جنت میں داخل ہوں گے؟ آپ صلی اللہ علیہ وسلم نے فرمایا: ”مچھلی کے جگر کا ٹکڑا“، اس نے کہا، اس کے بعد ان کی خوراک کیا ہو گی؟ آپ صلی اللہ علیہ وسلم نے فرمایا: ”ان کے لیے جنت کا وہ بیل ذبح کیا جائے گا، جو اس کے اطراف میں چرتا تھا“، اس نے کہا، اس کے بعد ان کا مشروب کیا ہو گا؟ آپ صلی اللہ علیہ وسلم نے فرمایا: ”جنت کا چشمہ، جس کا نام سلسبیل ہے“، اس نے کہا، آپ نے سچ فرمایا، پھر کہا، میں آپ سے ایک ایسی چیز کے بارے میں پوچھنے آیا ہوں جسے اہل زمین میں سے کسی نبی یا ایک دو آدمیوں کے سوا کوئی نہیں جانتا، آپ صلی اللہ علیہ وسلم نے فرمایا: ”اگر میں نے تمہیں بتا دیا تو تجھے فائدہ ہو گا؟“ اس نے کہا، غور سے سنوں گا، اس نے کہا، میں آپ سے اولاد کے بارے میں پوچھنے آیا ہوں؟ آپ صلی اللہ علیہ وسلم نے فرمایا: ”مرد کا پانی (منی) سفید ہوتا ہے اور عورت کا پانی زرد، جب دونوں مل جاتے ہیں، اور مرد کا پانی عورت کی منی پر غالب آ جاتا ہے تو وہ اللہ کے حکم سے مذکر پیدا ہوتا ہے اور جب عورت کی منی، مرد کی منی پر غالب آ جاتی ہے تو وہ اللہ کے حکم سے مونث بنتی ہے“، یہودی نے کہا، آپ نے واقعی صحیح فرمایا، اور آپ نبی ہیں، پھر واپس پلٹ کر چلا گیا تو رسول اللہ صلی اللہ علیہ وسلم نے فرمایا: ”اس نے مجھ سے ایسی چیز کے بارے میں سوال کیا کہ میں سوال کے وقت اس کے بارے میں کچھ نہیں جانتا تھا، یہاں تک کہ اللہ تعالیٰ نے مجھے اس کے بارے میں بتایا“۔

یہی روایت مجھے عبداللہ بن عبدالرحمن دارمی رحمہ اللہ نے یحییٰ بن حسان رحمہ اللہ کے واسطہ سے معاویہ بن سلام رحمہ اللہ کی مذکورہ بالا سند سے اس طرح سنائی، صرف اتنا فرق ہے کہ اوپر والی روایت میں «قَائِمًا» (کھڑا تھا) ہے اور اس میں «قَاعِدًا» (بیٹھا تھا)، اوپر لفظ (زیادہ) اور یہاں «زَائِدَةُ»، «أَذْكَرَا» اور «آنَثَا» کی جگہ «أَذْكَرَ» اور «آنَثَ» ہے، معنی ایک ہی ہے۔ «أَذْكَرَا»، «أَذْكَرَ» مذکر ہونا۔ «آنَثَا»، «آنَثَ» مونث ہونا۔