صحيح مسلم

حضرت عائشہ رضی اللہ عنہا بیان کرتی ہیں کہ نبی اکرم صلی اللہ علیہ وسلم، حضرت زینب بنت جحش رضی اللہ عنہا کے پاس ٹھہرتے اور وہاں شہد پیتے۔ تو میں نے اور حفصہ رضی اللہ عنہما نے ایکا (اتفاق) کیا کہ ہم میں سے جس کے ہاں بھی نبی اکرم صلی اللہ علیہ وسلم تشریف لائیں وہ کہے: مجھے آپ صلی اللہ علیہ وسلم سے مغافیر کی بو محسوس ہوتی ہے، کیا آپ صلی اللہ علیہ وسلم نے مغافیر کھایا ہے؟ تو آپ صلی اللہ علیہ وسلم ہم میں سے ایک کے ہاں تشریف لائے تو اس نے آپ صلی اللہ علیہ وسلم سے یہ بات کہی، تو آپ صلی اللہ علیہ وسلم نے فرمایا: ”بلکہ میں نے زینب بنت جحش کے ہاں شہد پیا ہے اور آئندہ نہیں پیوں گا۔“ اس پر یہ آیت اتری: ﴿يَا أَيُّهَا النَّبِيُّ لِمَ تُحَرِّمُ مَا أَحَلَّ اللَّهُ لَكَ﴾ (آپ وہ چیز کیوں حرام ٹھہراتے ہیں جو اللہ نے آپ کے لیے حلال قرار دی ہے) [سورة التحريم: 1] اور ﴿إِنْ تَتُوبَا إِلَى اللَّهِ﴾ [سورة التحريم: 4]، (یہ خطاب) عائشہ اور حفصہ رضی اللہ عنہما سے ہے، اور ﴿وَإِذْ أَسَرَّ النَّبِيُّ إِلَى بَعْضِ أَزْوَاجِهِ حَدِيثًا﴾ [سورة التحريم: 3] (اور جب نبی نے اپنی کسی بیوی سے ایک راز کی بات کہی) سے مراد آپ صلی اللہ علیہ وسلم کا یہ قول ہے: ”بلکہ میں نے شہد پیا ہے۔“

حضرت عائشہ رضی اللہ عنہا بیان کرتی ہیں کہ رسول اللہ صلی اللہ علیہ وسلم کو شیرینی اور شہد پسند تھا اور آپ صلی اللہ علیہ وسلم جب عصر کی نماز سے فارغ ہوتے تو تمام ازواجِ مطہرات کے ہاں تشریف لے جاتے اور ان کے قریب بیٹھتے۔ ایک دفعہ حضرت حفصہ رضی اللہ عنہا کے ہاں گئے اور عام معمول سے زیادہ ان کے پاس رک گئے۔ میں نے اس کا سبب پوچھا تو مجھے بتایا گیا کہ ان کی قوم کی کسی عورت نے انہیں شہد کی ایک کپی ہدیہ کے طور پر دی ہے، تو انہوں نے آپ صلی اللہ علیہ وسلم کو وہ شہد پلایا ہے۔ میں نے (دل میں) کہا: ”اللہ کی قسم! ہم اس کے لیے کوئی تدبیر اختیار کریں گی۔“ میں نے اس کا تذکرہ حضرت سودہ رضی اللہ عنہا سے کیا اور انہیں کہا کہ جب وہ آپ صلی اللہ علیہ وسلم کے ہاں آئیں گے اور آپ کے قریب بیٹھیں گے، تو ان سے کہنا: ”اے اللہ کے رسول صلی اللہ علیہ وسلم! کیا آپ صلی اللہ علیہ وسلم نے مغافیر کھایا ہے؟“ تو آپ صلی اللہ علیہ وسلم فوراً فرمائیں گے: ”نہیں“، تو ان سے کہنا: ”پھر یہ بو کیسی ہے؟“ اور رسول اللہ صلی اللہ علیہ وسلم کو یہ بات انتہائی ناگوار تھی کہ آپ صلی اللہ علیہ وسلم سے (ناگوار) بو آئے۔ تو آپ صلی اللہ علیہ وسلم یقیناً یہ فرمائیں گے: ”حفصہ نے مجھے کچھ شہد پلایا ہے“، تو ان سے کہنا: ”اس کی مکھی نے عرفط کا رس چوسا ہو گا“، اور میں بھی آپ صلی اللہ علیہ وسلم سے یہی کہوں گی، اور تم بھی اے صفیہ! یہی کہنا۔ تو جب آپ صلی اللہ علیہ وسلم حضرت سودہ رضی اللہ عنہا کے ہاں آئے، تو حضرت سودہ رضی اللہ عنہا بیان کرتی ہیں: ”اس ذات کی قسم جس کے سوا کوئی معبود نہیں! قریب تھا کہ میں آپ صلی اللہ علیہ وسلم کو بلند آواز سے وہ بات کہہ دوں جو تم نے مجھے کہی تھی، حالانکہ آپ صلی اللہ علیہ وسلم ابھی دروازے پر تھے، تیرے ڈر کی خاطر۔“ جب رسول اللہ صلی اللہ علیہ وسلم قریب پہنچے تو حضرت سودہ رضی اللہ عنہا نے کہا: ”اے اللہ کے رسول صلی اللہ علیہ وسلم! کیا آپ صلی اللہ علیہ وسلم نے مغافیر کھایا ہے؟“ آپ صلی اللہ علیہ وسلم نے فرمایا: ”نہیں“، انہوں نے کہا: ”پھر یہ بو کیسی ہے؟“ آپ صلی اللہ علیہ وسلم نے فرمایا: ”حفصہ نے مجھے تھوڑا سا شہد پلایا ہے“، انہوں نے کہا: ”شہد کی مکھی نے عرفط کا رس چوسا ہو گا۔“ جب آپ صلی اللہ علیہ وسلم میرے پاس تشریف لائے، تو میں نے بھی آپ صلی اللہ علیہ وسلم سے اسی طرح کہا، پھر آپ صلی اللہ علیہ وسلم حضرت صفیہ رضی اللہ عنہا کے ہاں گئے، انہوں نے بھی ایسے ہی کہا، تو جب آپ صلی اللہ علیہ وسلم دوبارہ حضرت حفصہ رضی اللہ عنہا کے ہاں پہنچے تو انہوں نے کہا: ”اے اللہ کے رسول صلی اللہ علیہ وسلم! کیا میں آپ کو اس (شہد) سے نہ پلاؤں؟“ آپ صلی اللہ علیہ وسلم نے فرمایا: ”اب مجھے اس کی ضرورت نہیں ہے۔“ حضرت عائشہ رضی اللہ عنہا بیان کرتی ہیں کہ حضرت سودہ رضی اللہ عنہا نے کہا: ”سبحان اللہ! ہم نے آپ صلی اللہ علیہ وسلم کو اس سے محروم کر دیا ہے“، تو میں نے ان سے کہا: ”خاموش رہو۔“

امام مسلم رحمہ اللہ کی صحیح مسلم کے راوی ابو اسحاق ابراہیم رحمہ اللہ مذکورہ بالا روایت امام صاحب رحمہ اللہ کے ہم پلہ ہو کر ابو اسامہ رحمہ اللہ سے ایک واسطہ سے بیان کرتے ہیں، اور امام مسلم رحمہ اللہ اپنے دوسرے استاد سے بھی ہشام بن عروہ رحمہ اللہ کی ہی سند سے بیان کرتے ہیں۔