مصنف ابن ابي شيبه

حضرت عبد اللہ بن بریدہ اپنے والد سے روایت کرتے ہیں۔ رسول اللہ صلی اللہ علیہ وآلہ وسلم نے انیس غزوات لڑے۔ اور آٹھ میں آپ صلی اللہ علیہ وآلہ وسلم نے قتال کیا۔

حضرت براء بن عازب سے روایت ہے کہ رسول اللہ صلی اللہ علیہ وآلہ وسلم نے انیس غزوات لڑے ہیں۔

حضرت زید بن ارقم رضی اللہ عنہ سے روایت ہے کہ رسول اللہ صلی اللہ علیہ وآلہ وسلم نے انیس غزوات کئے۔ ابو اسحاق کہتے ہیں میں نے زید بن ارقم رضی اللہ عنہ سے سوال کیا کہ آپ نے رسول اللہ صلی اللہ علیہ وآلہ وسلم کے ہمراہ کتنے غزوات میں شرکت کی ہے ؟ انہوں نے جواب دیا۔ سترہ غزوات میں۔

حضرت براء سے روایت ہے کہ میں نے نبی کریم صلی اللہ علیہ وآلہ وسلم کے ہمراہ پندرہ غزوات میں شرکت کی ہے۔ میں اور عبد اللہ بن عمر رضی اللہ عنہما ہم عمر ہیں۔

حضرت قتادہ سے منقول ہے کہ رسول اللہ صلی اللہ علیہ وآلہ وسلم نے انیس غزوات لڑے ، جن میں سے آٹھ غزوات میں آپ صلی اللہ علیہ وآلہ وسلم نے قتال (لڑائی) بھی کیا۔ غزوہ بدر، غزوہ احد، غزوہ احزاب، غزوہ قدید ، غزوہ خیبر، فتح مکہ، غزوہ بنی المصطلق، غزوہ حنین۔