مصنف ابن ابي شيبه

حضرت ابوہریرہ سے روایت ہے کہ رسول اللہ صلی اللہ علیہ وآلہ وسلم نے حضرت حسن بن علی رضی اللہ عنہ کو دیکھا کہ انہوں نے صدقہ کی ایک کھجور پکڑی اور اس کو انہوں نے اپنے منہ میں ڈال لیا۔ تو نبی کریم صلی اللہ علیہ وآلہ وسلم نے ارشاد فرمایا۔ کَخْ کَخْ (یعنی باہر نکالو) ہمارے لئے صدقہ حلال نہیں ہے۔

حضرت ابو رافع روایت کرتے ہیں کہ نبی کریم صلی اللہ علیہ وآلہ وسلم نے بنی مخزوم میں سے ایک آدمی کو صدقہ (کی وصولی) پر بھیجا۔ ابو رافع نے ان کے پیچھے جانے کا ارادہ کیا تو نبی کریم صلی اللہ علیہ وآلہ وسلم سے پوچھا۔ آپ صلی اللہ علیہ وآلہ وسلم نے فرمایا : کیا تمہیں معلوم نہیں ہے کہ ہمارے لئے صدقہ حلال نہیں ہے اور بیشک لوگوں کا غلام انہیں میں سے (شمار) ہوتا ہے۔

حضرت ابو لیلیٰ بیان کرتے ہیں کہ میں رسول اللہ صلی اللہ علیہ وآلہ وسلم کے پاس حاضر تھا کہ آپ صلی اللہ علیہ وآلہ وسلم کھڑے ہوئے اور صدقہ کے کمرہ میں داخل ہوگئے اور آپ صلی اللہ علیہ وآلہ وسلم کے ہمراہ ایک بچہ، حضرت حسن یا حضرت حسین بھی داخل ہوگیا۔ پس اس بچہ نے ایک کھجور پکڑ لی اور اسے اپنے منہ میں ڈال لیا۔ تو نبی کریم صلی اللہ علیہ وآلہ وسلم نے اس کو باہر نکلوایا اور فرمایا ۔ بلاشبہ ہمارے لیئے صدقہ حلال نہیں ہے۔

حضرت ابو عمیرہ رشید بن مالک روایت کرتے ہیں کہ میں ایک دن نبی کریم صلی اللہ علیہ وآلہ وسلم کی خدمت میں حاضر تھا کہ ایک آدمی طبق لے کر حاضر ہوا جس میں کھجوریں تھیں۔ آپ صلی اللہ علیہ وآلہ وسلم نے پوچھا۔ یہ کیا ہے ؟ صدقہ ہے یا ہدیہ ؟ اس آدمی نے عرض کیا (ہدیہ نہیں ہے) بلکہ صدقہ ہے۔ آپ صلی اللہ علیہ وآلہ وسلم نے وہ کھجوروں کا طبق لوگوں کی طرف بڑھا دیا۔ حسن آپ صلی اللہ علیہ وآلہ وسلم کے سامنے مٹی میں لوٹ رہے تھے تو انہوں نے ایک کھجور پکڑی اور اس کو اپنے منہ میں ڈال لیا۔ پس رسول اللہ صلی اللہ علیہ وآلہ وسلم نے ان کی طرف دیکھ لیا تو آپ صلی اللہ علیہ وآلہ وسلم نے اپنی انگلی مبارک ان کے منہ میں داخل کی اور اس کو باہر نکال لیا پھر آپ صلی اللہ علیہ وآلہ وسلم نے فرمایا۔ بلاشبہ ہم آل محمد (صلی اللہ علیہ وآلہ وسلم) صدقہ نہیں کھاتے۔

حضرت ابن ابی ملیکہ روایت کرتے ہیں کہ خالد بن سعید بن العاص نے حضرت عائشہ رضی اللہ عنہا کی طرف ایک گائے بھیجی تو انہوں نے واپس بھیج دی اور فرمایا۔ ہم آل محمد (صلی اللہ علیہ وآلہ وسلم) صدقہ نہیں کھاتے۔

حضرت عبد اللہ بن بریدہ اپنے والد سے روایت کرتے ہیں کہ جب حضرت سلمان فارسی مدینہ میں آئے تو وہ رسول اللہ صلی اللہ علیہ وآلہ وسلم کی خدمت میں ایک طبق بطور ہدیہ لائے اور انہوں نے اس طبق کو آپ صلی اللہ علیہ وآلہ وسلم کے سامنے رکھ دیا۔ آپ صلی اللہ علیہ وآلہ وسلم نے پوچھا۔ یہ کیا ہے ؟ راوی نے آگے مکمل حدیث بیان کی۔

حضرت انس سے روایت ہے کہ نبی کریم صلی اللہ علیہ وآلہ وسلم کو ایک کھجور ملی تو آپ صلی اللہ علیہ وآلہ وسلم نے فرمایا : اگر تو صدقہ کی نہ ہوتی تو میں تجھے کھا لیتا۔ اور (امام) ابوحنیفہ کا قول یہ ذکر کیا گیا ہے کہ : بنی ہاشم کے موالی وغیرہ کے لئے صدقہ حلال ہے۔