مصنف ابن ابي شيبه

حضرت مغیرہ بن شعبہ سے روایت ہے کہ نبی کریم صلی اللہ علیہ وآلہ وسلم نے پیشاب فرمایا تو وضو کیا اور جرابوں ، جوتیوں پر مسح فرمایا۔

حضرت ابو ظبیان فرماتے ہیں کہ میں نے حضرت علی رضی اللہ عنہ کو کھڑے ہوئے پیشاب کرتے دیکھا پھر آپ نے وضو کیا اور اپنی نعلین پر مسح فرمایا۔

حضرت زید فرماتے ہیں کہ حضرت علی رضی اللہ عنہ نے پیشاب فرمایا اور نعلین پر مسح کیا۔

حضرت سوید بن غفلہ سے روایت ہے کہ حضرت علی رضی اللہ عنہ مرتضیٰ نے پیشاب کیا اور (پھر) نعلین پر مسح کیا۔

حضرت اوس بن اوس، اپنے والد سے روایت کرتے ہیں کہ میں اپنے والد کے ہمراہ تھا، پس وہ عرب کے کنووں میں سے ایک کنویں پر پہنچے تو انہوں نے وضو کیا اور اپنی نعلین پر مسح کیا۔ میں نے ان سے اس بارے میں کہا تو انہوں نے فرمایا : میں نے نبی کریم صلی اللہ علیہ وآلہ وسلم کو جو کرتے دیکھا ہے میں نے اس پر زیادتی نہیں کی۔

حضرت سعید بن عبد اللہ بن ضرار روایت کرتے ہیں حضرت انس بن مالک رضی اللہ عنہ نے وضو فرمایا تو آپ نے اپنی جرابوں پر مسح فرمایا۔

حضرت خلاص فرماتے ہیں کہ میں نے حضرت علی رضی اللہ عنہ کو دیکھا تو انہوں نے رحبہ مقام پر پیشاب کیا پھر انہوں نے اپنی جرابوں اور جوتوں پر مسح کیا۔ اور (امام) ابوحنیفہ کا قول یہ ذکر کیا گیا ہے کہ : وہ جرابوں اور جوتیوں پر مسح کو مکروہ سمجھتے تھے۔ اِلّا یہ کہ جرابوں کے نیچے چمڑا لگا ہو۔