مصنف ابن ابي شيبه

حضرت جابر سے روایت ہے کہ رسول اللہ صلی اللہ علیہ وآلہ وسلم نے ارشاد فرمایا : ہدی (حج کی قربانی) پر سواری کرو معروف (اچھے انداز) کے ساتھ یہاں تک کہ تم کوئی سواری پالو۔

حضرت ابوہریرہ سے روایت ہے کہ نبی کریم صلی اللہ علیہ وآلہ وسلم نے ایک آدمی کو اونٹ ہانکتے ہوئے دیکھا تو آپ صلی اللہ علیہ وآلہ وسلم نے فرمایا؛ اس پر سوار ہو جاؤ۔ اس آدمی نے عرض کیا۔ یہ بدنہ (حج کی قربانی) ہے۔ آپ صلی اللہ علیہ وآلہ وسلم نے فرمایا : اس پر سوار ہو جاؤ اگرچہ یہ بدنہ ہے۔

حضرت انس سے روایت ہے کہ رسول اللہ صلی اللہ علیہ وآلہ وسلم نے ایک آدمی کو اونٹ ہانکتے ہوئے دیکھا تو فرمایا : اس پر سوار ہو جاؤ۔ اس آدمی نے عرض کیا کہ یہ بدنہ (حج کا جانور) ہے۔ آپ صلی اللہ علیہ وآلہ وسلم نے فرمایا (پھر بھی) اس پر سوار ہو جاؤ۔

حضرت عکرمہ فرماتے ہیں کہ ایک آدمی نے حضرت ابن عباس رضی اللہ عنہما سے سوال کیا : کیا بدنہ (حج کے جانور) پر سواری کی جاسکتی ہے ؟ آپ نے فرمایا : بوجھل کئے بغیر (سواری کی جاسکتی ہے) سائل نے پوچھا : اس کا دودھ دوہا جاسکتا ہے ؟ آپ نے فرمایا : ہلکا پھلکا۔

حضرت انس کے بارے میں روایت ہے کہ انہوں نے فرمایا : اس پر سوار ہو جاؤ۔ مخاطب نے کہا۔ یہ بدنہ ہے ؟ انہوں نے فرمایا (پھر بھی) اس پر سوار ہو جاؤ۔

حضرت علی رضی اللہ عنہ سے روایت ہے کہ آدمی اپنے بدنہ پر معروف کے ساتھ سواری کرسکتا ہے۔ اور (امام) ابوحنیفہ کا قول یہ ذکر کیا گیا ہے کہ : بدنہ پر سواری نہیں کی جاسکتی ہاں اگر بدنہ کے مالک کو شدید مشقت لاحق ہو تو پھر سواری کی جاسکتی ہے۔