مصنف ابن ابي شيبه

حضرت عبد اللہ بن عامر بن ربیعہ اپنے والد سے روایت کرتے ہیں کہ ایک آدمی نے نبی صلی اللہ علیہ وآلہ وسلم کے زمانہ مبارک میں دو جوتیوں کو مہر بنا کر نکاح کیا تو نبی صلی اللہ علیہ وآلہ وسلم نے اس کے نکاح کو جائز قرار دیا۔

حضرت سہل بن سعد سے روایت ہے کہ نبی کریم صلی اللہ علیہ وآلہ وسلم نے ایک آدمی سے کہا۔ جاؤ اس نے س عورت سے تمہارا نکاح کردیا ہے اور تم اس کو قرآن کی ایک سورة سکھا دو ۔

حضرت ابن ابی لبییہ اپنے داد ا سے روایت کرتے ہیں کہ رسول اللہ صلی اللہ علیہ وآلہ وسلم نے ارشاد فرمایا جو شخص ایک درہم کے عوض (عورت میں) حلّت کو طلب کرتا ہے تو تحقیق حلّت ثابت ہوجاتی ہے۔

حضرت عبد الرحمن بن بیلمانی بیان کرتے ہیں کہ نبی کریم صلی اللہ علیہ وآلہ وسلم نے خطبہ ارشاد فرمایا اور فرمایا : { أَنْکِحُوا الأَیَامَی مِنْکُمْ } ایک آدمی کھڑا ہوا اس نے عرض کیا : یا رسول اللہ صلی اللہ علیہ وآلہ وسلم ! ان کے درمیان بندھن (کا عوض) کیا ہے ؟

حضرت انس سے روایت ہے کہ عبد الرحمان بن عوف نے ایک گٹھلی کے وزن کے بقدر سونے کے عوض نکاح کیا تھا۔ جس کی قیمت تین درہم اور تہائی درہم تھی۔

حسن سے منقول ہے کہ جس مقدار پر میاں بیوی راضی ہوجائیں وہی مہر ہوگا۔

حضرت ابن عون کہتے ہیں کہ میں نے حسن سے اس مقدار (مہر) کا سوال کیا جس پر آدمی شادی کرسکتا ہے ؟ انہوں نے فرمایا : گٹھلی کے وزن کے بقدر سونا۔

حضرت سعید بن المسیب سے منقول ہے کہ اگر عورت ایک لاٹھی (حق مہر) پر راضی ہوجائے تو یہی مہر ہوجائے گا۔

حضرت ابن البیلمانی سے روایت ہے کہ نبی کریم صلی اللہ علیہ وآلہ وسلم نے ارشاد فرمایا۔ { وَآتُوا النِّسَائَ صَدُقَاتِہِنَّ نِحْلَۃً } راوی کہتے ہیں : لوگوں نے عرض کیا کہ یا رسول اللہ صلی اللہ علیہ وآلہ وسلم ! ان کے مابین بندھن (کا عوض) کیا ہے ؟ آپ صلی اللہ علیہ وآلہ وسلم نے فرمایا : جس شئی پر ان کے گھر والے راضی ہوجائیں۔ اور (امام) ابوحنیفہ کا قول یہ ذکر کیا گیا ہے کہ : آدمی ، عورت کے ساتھ دس درہم سے کم مقدار پر شادی نہیں کرسکتا۔