مصنف ابن ابي شيبه

حضرت خلید العصری رحمہ اللہ فرماتے ہیں کہ جب حضرت سلمان رضی اللہ عنہ ہمارے ہاں تشریف لائے تو ہم لوگ ان کی خدمت میں آئے تاکہ ہم ان سے قرآن مجید پڑھیں۔ آپ رضی اللہ عنہ نے فرمایا : یقینا قرآن عربی ہے۔ پس تم لوگ اس کو کسی عربی سے پڑھو۔ تو حضرت زید بن صوحان رحمہ اللہ ہمیں پڑھایا کرتے تھے۔ جب وہ کوئی غلطی کرتے تو حضرت سلمان رضی اللہ عنہان کو غلطی پر پکڑ لیتے۔ اور جب وہ درست کرلیتے تو آپ رضی اللہ عنہ فرماتے : اللہ کی قسم ! ایسے ہی ہے۔

حضرت مغیرہ فرماتے ہیں کہ ابراہیم رحمہ اللہ نے ارشاد فرمایا : کہ رسول اللہ صلی اللہ علیہ وسلم نے غزوہ بدر کے دن ایک عربی کا فدیہ چالیس اوقیہ مقرر فرمایا : اور ایک غلام کا فدیہ بیس اوقیہ مقرر فرمایا۔ اور ایک اوقیہ چالیس درہم کا ہوتا ہے۔

حضرت خرشہ رحمہ اللہ فرماتے ہیں کہ حضرت عمر رضی اللہ عنہ نے ارشاد فرمایا : عرب کی ہلاکت ہوگی جب فارس کی لڑکیوں کی اولاد بالغ ہوجائے گی۔

حضرت عثمان بن عفان رضی اللہ عنہ فرماتے ہیں کہ رسول اللہ صلی اللہ علیہ وسلم نے ارشاد فرمایا : جو شخص اہل عرب کو دھوکہ دے گا وہ میری شفاعت میں داخل نہیں ہوگا۔ اور نہ ہی میری محبت پائے گا۔

حضرت مستظل بن حصین رحمہ اللہ فرماتے ہیں کہ حضرت عمر بن خطاب رضی اللہ عنہ ہم سے خطاب فرما رہے تھے آپ رضی اللہ عنہ نے فرمایا : ربِ کعبہ کی قسم ! تحقیق مجھے معلوم ہے کہ اہل عرب کب ہلاک ہوں گے ؟ مسلمانوں میں سے ایک آدمی نے کھڑے ہو کر پوچھا : اے امیر المؤمنین : یہ لوگ کب ہلاک ہوں گے ؟ آپ رضی اللہ عنہ نے فرمایا : جب اس کا معاملہ وہ شخص سنبھالے گا جس نے نہ جاہلیت میں کبھی کوئی تدبیر وغیرہ کی اور نہ ہی رسول اللہ صلی اللہ علیہ وسلم کی صحبت اختیار کی ہو۔

حضرت حصین مزنی رحمہ اللہ فرماتے ہیں کہ حضرت عمر بن خطاب رضی اللہ عنہ نے ارشاد فرمایا : بیشک اہل عرب کی مثال اس اونٹ کی سی ہے جو شریف ہو اور اپنے چلانے والے کا تابع ہو۔ پس ان کے قائد کو چاہیے کہ وہ دیکھے کہ وہ ان کی کس طرف راہنمائی کر رہا ہے۔ باقی رہا میں تو رب کعبہ کی قسم ! میں ضرور بالضرور ان کو سیدھے راستہ پر ڈالوں گا۔

حضرت قیس رحمہ اللہ فرماتے ہیں کہ حضرت عمرو بن معد یکرب رحمہ اللہ قادسیہ کے دن ہمارے پاس سے گزرے اس حال میں کہ ہم صفوں میں تھے ، آپ رضی اللہ عنہ نے فرمایا : اے گروہ عرب ! تم لوگ سخت حملہ کرنے والے شیر بن جاؤ۔ بیشک شیر تو اپنی حالت سے بےپروا ہوتا ہے۔ بیشک ایرانی تو اس ہرن کی طرح ہیں جس کو نیزہ لگ چکا ہو۔

حضرت محمد بن عبدا اللہ بن کثیر بن الصلت رحمہ اللہ فرماتے ہیں کہ ہمارے ایک آزاد کردہ غلام نے ایک عربی عورت سے نکاح کرلیا۔ تو اس کو حضرت عمر بن عبد العزیز رحمہ اللہ کے پاس لایا گیا اور اس کے خلاف مدد مانگی گئی تو آپ رحمہ اللہ نے فرمایا : اللہ کی قسم ! تحقیق آل کثیر کے غلام نے اپنے رتبہ اور اپنی حد سے بڑھ کر کام کیا۔

حضرت سعید بن مسیب فرماتے ہیں کہ حضرت عمر رضی اللہ عنہ نے عربی کو باندی کے ساتھ شادی کرنے سے منع فرمایا۔ آپ نے باندیوں کے ساتھ شادی کرنے والے عربوں کے بارے میں چھ قلائص کا فیصلہ فرمایا مرد و عورت اس میں برابر ہیں اور موالی کا بھی یہی حکم ہے جبکہ معلوم نہ ہو۔ حضرت زہری فرماتے ہیں کہ عربی اور موالی نسب میں برابر نہیں۔

حضرت محمد بن ابی رزین رحمہ اللہ اپنی والدہ سے نقل کرتے ہیں کہ حضرت ام جریر پر بہت ہی سخت ہوتی یہ بات کہ جب عرب کا کوئی آدمی مرجاتا ، تو ان سے اس بارے میں پوچھا گیا : اے ام جریر ! یقینا ہم نے آپ کو دیکھا کہ جب عرب کا کوئی آدمی مرجاتا ہے تو آپ پر یہ بات بہت ہی سخت گزرتی ہے ۔ آپ نے فرمایا : میں نے اپنے آقا کو یوں فرماتے ہوئے سنا : کہ رسول اللہ صلی اللہ علیہ وسلم نے ارشاد فرمایا : بیشک عرب کا ہلاک ہونا قیامت کے قریب ہونے کی نشانی ہے۔ اور ان کے آقا حضرت طلحہ بن مالک رضی اللہ عنہ تھے۔