مصنف ابن ابي شيبه

حضرت ابن عون رحمہ اللہ فرماتے ہیں کہ حضرت عمیر بن اسحاق رحمہ اللہ نے ارشاد فرمایا : کہ حضرت حمزہ رضی اللہ عنہ نبی کریم صلی اللہ علیہ وآلہ وسلم کے آگے دو تلواروں سے لڑا کرتے تھے اور فرماتے جاتے ! میں اللہ کا شیر ہوں اور رسول اللہ صلی اللہ علیہ وسلم کا شیر ہوں۔

حضرت زکریا رحمہ اللہ فرماتے ہیں کہ حضرت عامر رضی اللہ عنہ نے ارشاد فرمایا : غزوہ احد کے دن حضرت حمزہ رضی اللہ عنہ کو شہید کردیا گیا۔ اور حضرت حنظلہ بن راھب رضی اللہ عنہ کو بھی شہید کردیا گیا جن کو فرشتوں نے غسل دے کر پاک کیا۔

حضرت سالم رحمہ اللہ فرماتے ہیں کہ حضرت سعید بن جبیر رحمہ اللہ نے ارشاد فرمایا : جب حضرت حمزہ بن عبد المطلب اور حضرت مصعب بن عمیر رضی اللہ عنہ غزوہ احد کے دن شہید ہوگئے اور انہوں نے جو ثواب و انعام دیکھنا تھا دیکھ لیا تو کہنے لگے۔ کاش ہمارے بھائی بھی اس کے بارے میں جان لیتے جو ہمیں ثواب و انعام ملا ہے تاکہ ان کے شوق میں مزید اضافہ ہوتا۔ تو اللہ رب العزت نے فرمایا : میں تمہاری طرف سے یہ پیغام ان کو پہنچاؤں گا ۔ پھر اللہ تعالیٰ نے یہ آیات نازل فرمائیں ! ترجمہ : اور تم ہرگز گمان مت کرو ان لوگوں کو مردہ جو اللہ کے راستہ میں قتل کردیے گئے بلکہ وہ اپنے رب کے ہاں زندہ ہیں اور رزق دیے جاتے ہیں۔ اللہ کے اس قول تک … اور یقینا اللہ مومنین کا اجر ضائع نہیں کرتا۔