مصنف ابن ابي شيبه

حضرت ابن ابی نجیح فرماتے ہیں کہ حضرت مجاہد نے ارشاد فرمایا : میں نے حضرت ابن عباس رضی اللہ عنہما پر تین مرتبہ قرآن کا دور کیا۔

حضرت ابان بن صالح فرماتے ہیں کہ حضرت مجاہد نے ارشاد فرمایا : میں نے تین مرتبہ شروع قرآن سے لے کر آخر تک حضرت ابن عباس رضی اللہ عنہما کے سامنے دور کیا۔ میں ہر آیت پڑھنے کے وقت ٹھہرتا تھا۔

حضرت ابن عباس رضی اللہ عنہما فرماتے ہیں کہ یقینا رسول اللہ صلی اللہ علیہ وآلہ وسلم ہر رمضان میں ایک مرتبہ قرآن پاک کا دور فرماتے تھے سوائے اس سال کہ جس میں آپ صلی اللہ علیہ وآلہ وسلم کا انتقال ہوا۔ پس اس سال آپ صلی اللہ علیہ وآلہ وسلم نے حضرت عبد اللہ بن مسعود رضی اللہ عنہ کی موجودگی میں دو مرتبہ دور فرمایا : پس آپ کو معلوم ہے جو آیت نسخ ہوئی اور جو آیت تبدیل ہوئی۔

حضرت ابن عباس رضی اللہ عنہما فرماتے ہیں کہ رسول اللہ صلی اللہ علیہ وآلہ وسلم ہر رمضان میں قرآن پاک کا حضرت جبرائیل سے دور فرماتے تھے ۔ پس جس مہینہ میں آپ صلی اللہ علیہ وآلہ وسلم کا انتقال ہوا اس میں دو مرتبہ دور فرمایا۔

حضرت موسیٰ بن علی رضی اللہ عنہ ّ فرماتے ہیں کہ میں نے اپنے والد کو یوں فرماتے ہوئے سنا کہ : میں حضرت فضالہ بن عبید کے پاس ان کا قرآن سننے کے لیے اس وقت تک ٹھہرا جب تک انہوں نے اسے مکمل نہ کرلیا۔

حضرت ابن سیرین فرماتے ہیں کہ حضرت عبیدہ نے ارشاد فرمایا : وہ قراءت جو نبی صلی اللہ علیہ وآلہ وسلم کے ان کے انتقال والے سال پڑھی گئی تھی یہ وہی قراءت تھی جو لوگ آج پڑھتے ہیں۔

حضرت ہشام فرماتے ہیں کہ حضرت ابن سیرین نے ارشاد فرمایا : حضرت جبرائیل ہر سال رمضان میں ایک مرتبہ نبی صلی اللہ علیہ وآلہ وسلم کے ساتھ قرآن کا دور فرماتے تھے۔ پس جب وہ سال آیا جس میں نبی صلی اللہ علیہ وآلہ وسلم کا انتقال ہوا تو آپ نے دو مرتبہ قرآن کا دور فرمایا۔

حضرت عائشہ رضی اللہ عنہا فرماتی ہیں کہ حضرت فاطمہ نے ارشاد فرمایا : رسول اللہ صلی اللہ علیہ وآلہ وسلم ہر سال میں ایک مرتبہ حضرت جبرائیل کے ساتھ قرآن کا دور فرماتے تھے۔ پس جس سال آپ صلی اللہ علیہ وآلہ وسلم کا انتقال ہوا تو آپ صلی اللہ علیہ وآلہ وسلم نے ان کے ساتھ دو مرتبہ دور فرمایا۔