مصنف ابن ابي شيبه

حضرت سعید بن مسیب فرماتے ہیں کہ رسول اللہ صلی اللہ علیہ وآلہ وسلم حضرت بلال کے پاس سے گزرے اس حال میں کہ وہ قرآن کی ایک سورت سے کچھ حصہ اور دوسری سورت سے کچھ حصہ پڑھ رہے تھے ، تو آپ صلی اللہ علیہ وآلہ وسلم نے فرمایا : اے بلال ! میں تیرے پاس سے گزرا اس حال میں کہ تو یہ سورت اور یہ سورت ملا کر پڑھ رہا تھا ! تو حضرت بلال نے فرمایا : میرا باپ آپ صلی اللہ علیہ وآلہ وسلم پر قربان ہو اے اللہ کے رسول (صلی اللہ علیہ وآلہ وسلم) ! میں نے چاہا کہ پاکیزہ حصہ کو پاکیزہ حصہ کے ساتھ ملاؤں۔ آپ صلی اللہ علیہ وآلہ وسلم نے فرمایا : سورت کو ایسے طریقہ سے پڑھو۔

حضرت ابو اسحاق فرماتے ہیں کہ حضرت معاذ ایک سورت کے کچھ حصے کو دوسری سورت کے کچھ حصے کے ساتھ ملا کر پڑھ رہے تھے پس ان کو اس کے بارے میں کہا گیا۔ تو آپ نے فرمایا : تم میرے بارے میں یہ کیوں سمجھ رہے ہو کہ میں قرآن کو غیر قرآن کے ساتھ ملا رہا ہوں ؟ !

حضرت زید بن یثیع فرماتے ہیں کہ نبی صلی اللہ علیہ وآلہ وسلم حضرت بلال کے پاس سے گزرے ، پھر راوی نے حضرت حاتم کی حدیث کی مانندروایت نقل کی۔

حضرت ابن عون فرماتے ہیں کہ محمد سے اس شخص کے بارے میں سوال کیا گیا جو قرآن میں یہاں سے وہاں سے ملا کر پڑھتا ہو ؟ تو آپ نے فرمایا : اس کو چاہیے کہ وہ ایسا کرنے سے بچے، وہ زیادہ گناہگار نہیں ہوگا اس حال میں کہ وہ نہ جانتا ہو۔

حضرت اشعث فرماتے ہیں کہ حسن ناپسند کرتے تھے کہ دو سورتوں کو اکٹھا پڑھا جائے یہاں تک کہ پہلے ایک کے آخر کو مکمل کرے پھر وہ دوسری پڑھ لے۔

حضرت ولید بن جمیع فرماتے ہیں کہ مجھے ایک آدمی نے بیان کیا کہ حضرت خالد بن ولید نے حیرہ مقام پر لوگوں کی امامت کر وائی اور مختلف سورتوں میں سے تلاوت کی پھر نماز سے فارغ ہو کر ہماری طرف متوجہ ہوئے اور فرمایا : جہاد نے ہمیں قرآن سیکھنے سے مشغول کردیا۔