مصنف ابن ابي شيبه

حضرت قتادہ فرماتے ہیں کہ میں نے حضرت انس سے نبی صلی اللہ علیہ وآلہ وسلم کی قراءت کے بارے میں پوچھا ؟ تو آپ نے فرمایا : آپ صلی اللہ علیہ وآلہ وسلم اپنی آواز کو لمباکر کے پڑھتے تھے۔

حضرت ابن ابی ملیکہ فرماتے ہیں کہ حضرت ام سلمہ نے ارشاد فرمایا : نبی صلی اللہ علیہ وآلہ وسلم کا پڑھنا ایسے تھا : سب تعریف اللہ کے لیے ہے جو تمام جہانوں کا پروردگار ہے۔ پس آپ نے ایک ایک حرف ذکر فرمایا :

ابراہیم فرماتے ہیں کہ حضرت علقمہ حضرت عبد اللہ بن مسعود رضی اللہ عنہ پر پڑھا کرتے تھے تو آپ فرماتے ! ٹھہر کر پڑھ۔ میرے ماں باپ تجھ پر فدا ہوں۔ پس یہی تو قرآن کی زیب وزینت ہے۔

حضرت ابوب فرماتے ہیں کہ حضرت ابن سیرین جب پڑھتے تو اپنی قراءت میں جلدی کرتے تھے۔

حضرت عثمان بن الاسود فرماتے ہیں کہ حضرت مجاہد اور حضرت عطاء جلدی جلدی قرآن پڑھتے تھے۔

حضرت وائل بن حجر فرماتے ہیں کہ میں نے نبی صلی اللہ علیہ وآلہ وسلم کو سنا آپ صلی اللہ علیہ وآلہ وسلم نے پڑھا : ولا الضالین اور نہ ہی بھٹکنے والے، پھر آپ صلی اللہ علیہ وآلہ وسلم نے کہا : آمین اور اپنی آواز کو لمبا کیا۔

امام شعبی فرماتے ہیں کہ حضرت عبد اللہ بن مسعود رضی اللہ عنہ نے ارشاد فرمایا : قرآن کو جلدی جلدی مت پڑھو ، شعر کے جلدی پڑھنے کی طرح، اور نہ ہی غیر منظوم انداز میں پڑھو ردی کھجور بکھیرنے کی طرح۔

حضرت منصور فرماتے ہیں کہ حضرت مجاہد نے ارشاد فرمایا : اور قرآن کو ٹھہر ٹھہر کر پڑھو۔ یعنی اس کے بعض حصہ کو بعض کے پیچھے پیچھے پڑھو۔

حضرت مقسم فرماتے ہیں کہ حضرت ابن عباس رضی اللہ عنہما نے اس آیت کے بارے میں فرمایا : قرآن کو ٹھہر ٹھہر کر پڑھو۔ یعنی اس کو واضح انداز میں پڑھو۔

حضرت عبید مکتب فرماتے ہیں کہ حضرت مجاہد سے ایسے دو آدمیوں کے بارے میں پوچھا گیا جن میں سے ایک نے سورة بقرہ پڑھی اور دوسرے نے سورة بقرہ اور سورة آل عمران پڑھی، اور ان دونوں کے رکوع اور سجدے اور ان دونوں کا بیٹھنا برابر تھا۔ ان دونوں میں سے کون افضل ہے ؟ آپ نے ارشاد فرمایا : جس نے سورة بقرہ پڑھی، پھر مجاہد نے تائید میں یہ آیت پڑھی : اور نازل کیا ہے ہم نے اس قرآن کو واضح مضامین کے ساتھ تاکہ پڑھ کر سناؤ تم اسے انسانوں کو ٹھہر ٹھہر کر اور نازل کیا ہے ہم نے اس کو بتدریج ( حسب موقع) ۔

حضرت عبید اللہ بن عبد الرحمن بن موھب فرماتے ہیں کہ میں نے حضرت محمد بن کعب القرظی کو یوں فرماتے ہوئے سنا ہے کہ ! میں ان سورتوں کو پڑھوں : اذا زلزلت الارض اور سورة القارعۃ کو۔ میں ان دونوں کو بار بار پڑھوں اور ان دونوں میں غور و فکر کروں یہ مجھے زیادہ پسندیدہ ہے اس بات سے کہ میں قرآن کو جلدی جلدی پڑھوں۔

حضرت ثابت بن قیس فرماتے ہیں کہ میں نے حضرت عمر بن عبد العزیز کو قرآن پڑھتے ہوئے سنا : وہ ٹھہر ٹھہر کر پڑھتے تھے۔