مصنف ابن ابي شيبه

حضرت مجاہد فرماتے ہیں کہ حضرت ابوہریرہ نے ارشاد فرمایا؛ سورة فاتحہ مدینہ منورہ میں نازل ہوئی۔

حضرت ہشام بن عروہ فرماتے ہیں کہ ان کے والد حضرت عروہ نے ارشاد فرمایا : قرآن کے جس حصہ میں حج کے مسائل یا کسی فریضہ کو بیان کیا گیا ہے پس بلاشبہ وہ حصہ مدینہ میں نازل ہوا اور قرآن کے جس حصہ میں سابقہ امتوں اور صدیوں اور عذاب کا ذکر ہے پس بلاشبہ وہ حصہ مکہ میں نازل ہوا۔

حضرت سلمہ فرماتے ہیں کہ حضرت ضحاک نے ارشاد فرمایا : (اے ایمان والو ! ) یہ آیات مدینہ میں نازل ہوئیں۔

ابراہیم فرماتے ہیں کہ حضرت علقمہ نے ارشاد فرمایا : قرآن میں ہر وہ آیت جس میں ( اے ایمان والو ! ) کے ذریعہ خطاب ہے مدینہ میں نازل ہوئی، اور قرآن میں ہر وہ آیت جس میں ( اے لوگو ! ) کے ذریعہ خطاب ہے وہ مکہ میں نازل ہوئی۔

حضرت عبد الرحمن بن یزید فرماتے ہیں کہ حضرت عبد اللہ بن مسعود رضی اللہ عنہ نے ارشاد فرمایا : ہم نے چھوٹی سورتیں بطور دلائل کے مکہ میں پڑھیں، ان سورتوں میں ( اے ایمان والو) نہیں تھا۔

ایوب فرماتے ہیں کہ حضرت عکرمہ نے ارشاد فرمایا : ہر وہ سورت جس میں ( اے ایمان والو) موجود ہے وہ مدنی ہے۔

حضرت منصور فرماتے ہیں کہ حضرت مجاہد نے ارشاد فرمایا : سب تعریفیں اس اللہ کے لیے ہیں جو تمام جہانوں کا پروردگار ہے۔ یہ مدینہ میں نازل ہوئی۔

حضرت لیث فرماتے ہیں کہ حضرت شھر نے ارشاد فرمایا؛ سورة الانعام مکی سورت ہے۔

حضرت نضر بن قیس فرماتے ہیں کہ حضرت عروہ نے ارشاد فرمایا : ہر وہ آیت جس میں ( اے لوگو ! ) کے ذریعہ خطاب ہے وہ مکہ میں نازل ہوئی اور ہر وہ آیت جس میں ( اے ایمان والو ! ) کے ذریعہ خطاب ہے وہ مدینہ میں نازل ہوئی۔

حضرت ابن عون فرماتے ہیں کہ کچھ لوگوں نے امام شعبی کے پاس آیت پڑھی : جبکہ گواہی دے چکا ہے ایک گواہ بنی اسرائیل میں سے اسی جیسے کلام پر۔ پس کہا گیا : گواہ سے مراد حضرت عبد اللہ بن سلام ہیں تو آپ نے فرمایا : یہ ابن سلام کیسے ہوسکتے ہیں حالانکہ یہ سورت تو مکی ہے ؟ !۔

حضرت ہشام بن عروہ فرماتے ہیں کہ ان کے والد حضرت عروہ نے ارشاد فرمایا : بلاشبہ میں بہت اچھے طریقہ سے جانتا ہوں قرآن کا جو حصہ مکہ میں نازل ہوا اور جو حصہ مدینہ میں نازل ہوا۔ بہرحال جو حصہ مکہ میں نازل ہوا اس میں مثالوں کا بیان اور پچھلے واقعات کا ذکر ہے، اور باقی جو حصہ مدینہ میں نازل ہوا اس میں فرائض ، حدود اور جہاد کا بیان ہے۔