مصنف ابن ابي شيبه

حضرت جابر فرماتے ہیں کہ نبی صلی اللہ علیہ وآلہ وسلم نے ارشاد فرمایا : میں تمہارے درمیان وہ چیز چھوڑ کر جا رہا ہوں اگر تم اس کو مضبوطی سے پکڑ لو گے تو کبھی بھی گمراہ نہیں ہو گے : وہ کتاب اللہ ہے۔

حضرت یزید بن حبان فرماتے ہیں کہ ہم لوگ حضرت زید بن ارقم رضی اللہ عنہ کے پاس حاضر خدمت ہوئے تو ہم نے ان سے کہا : تحقیق آپ نے خیر کو دیکھا، آپ نے رسول اللہ صلی اللہ علیہ وآلہ وسلم کی صحبت پائی، اور آپ صلی اللہ علیہ وآلہ وسلم کے پیچھے نماز پڑھی تو آپ نے فرمایا : جی ہاں ! بیشک آپ صلی اللہ علیہ وآلہ وسلم نے ہم کو خطاب کیا اور فرمایا : میں تمہارے درمیان کتاب اللہ چھوڑے جار ہا ہوں۔ یہ اللہ کی رسی ہے جو اس کی پیروی کرے گا وہ ہدایت پر ہوگا، اور جو شخص اس کو چھوڑے گا وہ گمراہی پر ہوگا۔

حضرت سلیمان بن شرحبیل فرماتے ہیں کہ میں نے حضرت ابو امامہ کو یوں فرماتے ہوئے سنا ہے کہ قرآن پڑھو۔ یہ لٹکائے ہوئے مصاحف تمہیں ہرگز دھوکہ میں مت ڈالیں۔ اس لیے کہ اللہ ہرگز اس دل کو عذاب نہیں دیں گے جس نے قرآن کو محفوظ کیا ہو۔

حضرت عبد الرحمن بن یزید فرماتے ہیں کہ حضرت عبد اللہ بن مسعود رضی اللہ عنہ نے ارشاد فرمایا : جو قرآن پڑھ لے پس اس کو چاہیے کہ وہ خوش ہوجائے۔

حضرت ابو سعید خدری فرماتے ہیں کہ نبی صلی اللہ علیہ وآلہ وسلم نے ارشاد فرمایا : میں تم میں دو عظیم الشان چیزیں چھوڑ کر جا رہا ہوں ، ان دونوں میں سے ایک دوسری سے بڑی ہے : کتاب اللہ وہ رسی ہے جو آسمان سے لے کر زمین تک دراز ہے۔