مصنف ابن ابي شيبه

حضرت جعفر بن عبد اللہ بن جعفر سے روایت ہے کہ حضرت جعفر بن ابی طالب اپنے دائیں ہاتھ میں انگوٹھی پہنا کرتے تھے۔

حضرت مختار بن سعد سے روایت ہے۔ وہ کہتے ہیں کہ میں نے حضرت محمد بن علی رضی اللہ عنہ کو اپنے دائیں ہاتھ میں انگوٹھی پہنتے دیکھا۔

حضرت صلت بن عبد اللہ بن نوفل سے روایت ہے۔ وہ کہتے ہیں کہ میں نے حضرت عبد اللہ بن عباس رضی اللہ عنہما کو دیکھا۔ ان کی انگوٹھی ان کے دائیں ہاتھ میں تھی۔ اور میرا خیال ہے کہ انہوں نے یہ بات بھی ذکر کی تھی کہ جناب نبی کریم صلی اللہ علیہ وآلہ وسلم بھی اسی طرح پہنا کرتے تھے۔

حضرت عبد اللہ بن جعفر سے روایت ہے کہ جناب نبی کریم صلی اللہ علیہ وآلہ وسلم اپنے دائیں ہاتھ میں انگوٹھی پہنا کرتے تھے۔

حضرت حماد بن سلمہ بیان کرتے ہیں ۔ کہتے ہیں کہ مجھے جناب نبی کریم صلی اللہ علیہ وآلہ وسلم کے مولی حضرت ابو رافع نے بتایا کہ حضرت عبد اللہ بن جعفر اپنے دائیں ہاتھ میں انگوٹھی پہنا کرتے تھے۔ اور ان کا گمان یہ تھا کہ جناب نبی کریم صلی اللہ علیہ وآلہ وسلم بھی اپنے دائیں ہاتھ میں انگوٹھی پہنتے تھے۔