مصنف ابن ابي شيبه

حضرت جعفر، اپنے والد سے روایت کرتے ہیں وہ کہتے ہیں کہ حضرت حسن اور حضرت حسین ۔ یہ دونوں اپنے بائیں ہاتھ میں انگوٹھی پہنا کرتے تھے۔

حضرت جعفر، اپنے والد سے روایت کرتے ہیں کہ انہوں نے فرمایا : حضرت ابوبکر اور حضرت عمر اور حضرت عثمان اپنے بائیں ہاتھ میں انگوٹھی پہنا کرتے تھے۔

حضرت عبید اللہ سے روایت ہے۔ وہ کہتے ہیں کہ میں نے حضرت قاسم اور حضرت سالم کو اپنے بائیں ہاتھ میں انگوٹھی ڈالتے دیکھا۔

اسماعیل سے روایت ہے۔ وہ کہتے ہیں میں نے ابراہیم کے بائیں ہاتھ میں انگوٹھی دیکھی۔

حضرت نافع، حضرت ابن عمر رضی اللہ عنہما کے بارے میں روایت کرتے ہیں کہ وہ اپنے بائیں ہاتھ میں انگوٹھی پہنا کرتے تھے۔

حضرت اعمش سے روایت ہے۔ وہ کہتے ہیں کہ میں نے ابراہیم کی انگوٹھی ان کے بائیں ہاتھ میں دیکھی۔

حضرت ابن سیرین سے روایت ہے کہ جناب نبی کریم صلی اللہ علیہ وآلہ وسلم ، حضرت ابوبکر ، حضرت عمر اور حضرت عثمان …یہ سب اپنے بائیں ہاتھ میں انگوٹھی پہنا کرتے تھے۔

اسماعیل ازرق سے روایت ہے۔ وہ کہتے ہیں کہ میں نے حضرت عمرو بن حریث کی انگوٹھی ان کے بائیں ہاتھ میں دیکھی۔