مصنف ابن ابي شيبه

حضرت سعید بن حویرث سے روایت ہے کہ میں نے ابن عباس رضی اللہ عنہما کو کہتے سُنا کہ ہم جناب نبی کریم صلی اللہ علیہ وآلہ وسلم کے ہاں حاضر تھے کہ آپ صلی اللہ علیہ وآلہ وسلم قضاء حاجت سے واپس تشریف لائے اور آپ صلی اللہ علیہ وآلہ وسلم کے پاس کھانا لایا گیا ، تو آپ صلی اللہ علیہ وآلہ وسلم سے کہا گیا۔ آپ نے وضو کیوں نہیں کیا ؟ آپ صلی اللہ علیہ وآلہ وسلم نے فرمایا : ” میں نے نماز تو نہیں پڑھنی کہ میں وضو کروں۔ “

حضرت ہشام، اپنے والد سے روایت کرتے ہیں کہ حضرت عمر بن خطاب، بیت الخلاء سے نکلے اور ان کے پاس کھانا لایا گیا تو لوگوں نے کہا : ہم وضو کے لئے پانی منگواتے ہیں۔ حضرت عمر نے فرمایا : میں صرف اپنے دائیں ہاتھ سے کھاتا ہوں اور اپنے بائیں ہاتھ سے استنجا کرتا ہوں۔ چناچہ آپ نے کھانا کھایا درآنحالیکہ آپ نے پانی کو مس بھی نہیں کیا۔

حضرت سالم بن ابی الجعد، اپنے والد سے روایت کرتے ہیں کہ حضرت ابن مسعود نے ایک آدمی کو اپنے پاس کھانے کے لئے بلایا تو اس نے کہا۔ میں نے تو پیشاب کیا ہے۔ آپ نے فرمایا۔ تم نے اپنے ہاتھ میں توپیشاب نہیں کیا۔

حضرت سالم بن ابی الجعد، اپنے والد سے روایت کرتے ہیں کہ حضرت عبد اللہ نے ایک شخص کو اپنے کھانے کی طرف بلایا تو اس نے جواب دیا۔ میں پیشاب کر کے آیا ہوں۔ آپ نے فرمایا : تیرا پیشاب تیرے ہاتھ میں تو نہیں ہے۔