مصنف ابن ابي شيبه

حضرت معمر رحمہ اللہ کہتے ہیں کہ میں نے حضرت حماد رحمہ اللہ سے سوال کیا کہ اگر ایک آدمی کی چار بیویاں ہوں اور وہ کہے کہ اس کی ایک بیوی کو طلاق ہے تو کیا حکم ہے ؟ انہوں نے فرمایا کہ وہ جس پرچا ہے ہاتھ رکھ لے۔ حضرت معمر رحمہ اللہ کہتے ہیں کہ حسن رحمہ اللہ بھی یہی فرمایا کرتے تھے۔

حضرت ابو جعفر رحمہ اللہ فرماتے ہیں کہ کسی آدمی کے ایسا کہنے کی صورت میں حضرت علی رضی اللہ عنہ نے قرعہ اندازی کرائی تھی۔

حضرت قتادہ رحمہ اللہ اور حضرت شعبی رحمہ اللہ فرماتے ہیں کہ اگر اس نے کسی ایک کا نام لیا تو اسی کو طلاق ہوگی اور اگر نام نہ لیا تو سب کو طلاق ہوجائے گی۔

حسن رحمہ اللہ سے جب یہ سوال کیا گیا تو انہوں نے فرمایا کہ آدمی کی نیت کا اعتبار ہوگا۔

ابراہیم رحمہ اللہ فرماتے ہیں کہ اگر ایک شخص کی زیادہ بیویاں ہوں اور وہ کہے کہ اس کی ایک بیوی کی تین طلاق تو اگر کسی کی نیت کی تھی تو اسے طلاق ہوگی اور اگر کسی کی نیت نہیں کی تو ان میں سے جس کو چاہے اختیار کرلے۔ ایلاء اور ظہار کا بھی یہی حکم ہے۔

حضرت ابو جعفر رحمہ اللہ سے سوال کیا گیا کہ ایک آدمی کی چار بیویاں تھیں، ان میں سے ایک بیوی نے اسے جھانکا تو اس نے کہا کہ تجھے قطعی طلاق ہے، جب وہ ان کے پاس آیا تو ہر ایک کہنے لگی کہ وہ دوسری تھی، وہ اسے پہچان بھی نہ سکا کہ وہ کون سی تھی تو کیا حکم ہے ؟ حضرت ابو جعفر رحمہ اللہ نے فرمایا کہ سب اس سے جدا ہوجائیں گی۔