مصنف ابن ابي شيبه

نبی کریم حضور صلی اللہ علیہ وآلہ وسلم نے عید کی نماز میں بارہ تکبیرات کہیں، سات پہلی رکعت میں اور پانچ دوسری رکعت میں۔

ابو عائشہ رضی اللہ عنہا (جو کہ حضرت ابوہریرہ کے ہم مجلس تھے) فرماتے ہیں کہ میں سعید بن عاص کے پاس تھا۔ انہوں نے حضرت ابوموسیٰ اشعری اور حضرت حذیفہ رضی اللہ عنہ کو بلایا اور ان سے عیدین کی تکبیرات کے بارے میں سوال کیا۔ حضرت ابو موسیٰ نے فرمایا کہ حضور صلی اللہ علیہ وآلہ وسلم عیدین میں جنازے کی طرح چار تکبیرات کہا کرتے تھے۔ حضرت حذیفہ رضی اللہ عنہ نے ان کی تصدیق کی۔ حضرت ابو موسیٰ نے فرمایا کہ جب میں بصرہ کا گورنر تھا تو وہاں بھی اسی طرح نماز عید پڑھاتا تھا۔ ابو عائشہ رضی اللہ عنہا فرماتے ہیں کہ میں اس مجلس میں موجود تھا اور مجھے حضرت ابو موسیٰ کا یہ جملہ اچھی طرح یاد ہے : جنازے کی طرح چار تکبیرات۔

حضرت مکحول فرماتے ہیں کہ سعید بن عاص کو دیکھنے والے ایک صاحب نے مجھے بتایا کہ ایک مرتبہ سعید بن عاص نے ان صحابہ کرام میں سے چار کو بلایا جنہوں نے درخت کے نیچے (صلی اللہ علیہ وآلہ وسلم) کے ہاتھ پر بیعت کی تھی۔ سعید بن عاص نے ان سے عید کی تکبیرات کے بارے میں پوچھا تو انہوں نے بتایا کہ آٹھ تکبیریں ہیں۔ راوی کہتے ہیں کہ میں نے اس بات کا ذکر ابن سیرین سے کیا تو انہوں نے فرمایا کہ انہوں نے ٹھیک کہا البتہ وہ تکبیر تحریمہ کو چھوڑ گئے۔

حضرت مسروق کہتے ہیں کہ حضرت عبداللہ ہمیں عیدین کی نمازوں کے لئے نو تکبیرات سکھاتے تھے، پانچ پہلی رکعت میں اور چار دوسری رکعت میں۔ وہ دونوں کی قرائتوں کو ایک دوسرے سے ملایا کرتے تھے۔

حضرت شعبی فرماتے ہیں کہ حضرت عبداللہ عید الفطر اور عید الاضحی کے لئے نو نو تکبیرات کہتے تھے، پانچ پہلی رکعت میں اور چار دوسری میں اور دونوں کی قرائتوں کو ملایا کرتے تھے۔

حضرت حارث فرماتے ہیں کہ حضرت علی رضی اللہ عنہ عید الفطر کی نماز میں گیارہ تکبیریں کہتے تھے۔ چھ پہلی رکعت میں اور پانچ دوسری رکعت میں۔ دونوں رکعتوں کو قرائت سے شروع فرماتے ۔ آپ عید الاضحی میں پانچ تکبیرات کہا کرتے تھے، تین پہلی رکعت میں اور دو آخری رکعت میں۔ دونوں رکعتوں کو قرائت سے شروع کیا کرتے تھے۔

حضرت عطاء فرماتے ہیں کہ حضرت ابن عباس رضی اللہ عنہما تیرہ مرتبہ تکبیر کہا کرتے تھے۔

حضفرت عطاء فرماتے ہں م کہ حضرت ابن عباس رضی اللہ عنہما نے عید کی نماز میں تیرہ مرتبہ تکبیرات کہیں، سات مرتبہ پہلی رکعت میں اور چھ مرتبہ دوسری رکعت میں۔

حضرت نافع فرماتے ہیں کہ حضرت ابوہریرہ نے پہلی رکعت میں سات اور دوسری رکعت میں پانچ تکبیرات کہیں، سب کی سب قرائت سے پہلے تھیں۔

حضرت عطاء فرماتے ہیں کہ حضرت ابن عباس رضی اللہ عنہما نے عید کی نماز کی پہلی رکعت میں تکبیر تحریمہ سمیت سات تکبیرات اور دوسری رکعت میں رکوع کی تکبیر سمیت چھ تکبیرات کہیں، یہ سب زائد تکبیرات قرائت سے پہلے تھیں۔

حضرت ابن عباس رضی اللہ عنہما فرماتے ہیں کہ ولید بن عقبہ نے عید کی رات حضرت ابن مسعود، حضرت ابو مسعود، حضرت حذیفہ رضی اللہ عنہ اور حضرت ابو موسیٰ اشعری کو بلایا اور ان سے کہا کہ کل عید ہے، تکبیرات کیسے کہنی ہیں ؟ حضرت عبد اللہ نے فرمایا کہ تم قیام میں چار تکبیرات کہو، پھر سورت فاتحہ پڑھو اور مفصل میں سے کوئی سورت پڑھو جو نہ بہت لمبی ہو نہ بہت مختصر، پھر رکوع کرو، پھر قیام میں قرائت کرو، جب قرائت سے فارغ ہو جاؤ تو چار تکبیریں کہو، چوتھی تکبیر پر رکوع کرو۔

کردوس فرماتے ہیں کہ حضرت سعید بن عاص نے ماہ ذوالحجہ کے شروع میں حضرت عبد اللہ، حضرت حذیفہ رضی اللہ عنہ ، حضرت ابو مسعود انصاری اور حضرت ابو موسیٰ اشعری کو بلایا اور ان سے عید کی تکبیرات کے بارے میں سوال کیا، سب نے یہ معاملہ حضرت عبداللہ کے سپرد کردیا تو انہوں نے فرمایا کہ تم حالت قیام میں تکبیر کہو، پھر تکبیر کہو، پھر تکبیر کہو، پھر تکبیر کہہ کر قرائت کرو، پھر تکبیر کہہ کر رکوع کرو، پھر اگلی رکعت مں ا اٹھ کر قرائت کرو، پھر تکبیر کہو، پھر تکبیر کہو، پھر تکبیر کہو، پھر تکبیر کہہ کر رکوع میں چلے جاؤ۔

حضرت جابر بن عبد اللہ رضی اللہ عنہ اور حضرت سعید بن مسیب فرماتے ہیں کہ کل نو تکبیرات ہیں۔ نیز دونوں رکعتوں کی قرائت کو ملا کر نماز ادا ہوگی۔

حضرت عبد اللہ بن حارث فرماتے ہیں کہ حضرت ابن عباس رضی اللہ عنہما نے ہمیں عید کی نماز نو تکبیرات کے ساتھ پڑھائی، پانچ تکبیریں پہلی رکعت میں اور چار دوسری رکعت میں، نیز دونوں قرائتوں کو ملایا۔

حضرت شعبی فرماتے ہیں کہ زیاد نے مسروق کو پیغام دے کر بلوایا اور کہا کہ ہمارے بہت سے کام رہتے ہیں، ذرا عید کی تکبیرات کے بارے میں بتا دیجئے۔ فرمایا کہ عید میں نو تکبیرات ہیں، پانچ پہلی رکعت میں اور چار دوسری رکعت میں۔ دونوں کی قرائتوں کو ملاؤ یعنی دونوں قرائتوں کے درمیان کوئی زائد تکبیر نہ ہو۔

ابراہیم فرماتے ہیں کہ حضرت اسود اور حضرت مسروق عید کی نماز میں نو تکبیرات کہا کرتے تھے۔

حضرت محمد بن سیرین فرماتے ہیں کہ حضرت انس عید میں نو تکبیرات کہا کرتے تھے۔ پھر انہوں نے حضرت عبد اللہ جیسی حدیث نقل کی۔

ابراہیم فرماتے ہیں کہ حضرت عبداللہ کے شاگرد عیدین کی نمازوں میں نو تکبیرات کہا کرتے تھے۔

حضرت ابو قلابہ عیدین کی تکبیرات کے بارے میں فرماتے ہیں کہ وہ نو نو ہیں۔

حضرت جابر فرماتے ہیں کہ حضرت ابو جعفر عیدین کی تکبیرات کے بارے میں حضرت عبداللہ کے قول پر فتوٰی دیتے تھے۔

حضرت مکحول عید الاضحی اور عید الفطر کی تکبیرات کے بارے میں فرماتے ہیں کہ سات اور پانچ تکبیرات ہیں اور سب قرائت سے پہلے ہیں، قرائتوں کے درمیان تکبیر نہ ہوگی۔

حسن اور محمد عید میں نو تکبیرات کے قائل تھے۔

حضرت یحییٰ بن یعمر ایک عید میں نو تکبیرات اور دوسری میں گیارہ تکبیرات کہا کرتے تھے۔

حضرت عبد الرحمن بن رافع کہتے ہیں کہ حضرت عمر بن خطاب عیدین کی نمازوں میں بارہ تکبیرات کہا کرتے تھے، سات پہلی رکعت میں اور پانچ دوسری رکعت میں۔

حضرت عبد العزیز بن عمر اپنے والد کے بارے میں فرماتے ہیں کہ وہ عید کی نماز میں سات اور پانچ تکبیرات کہا کرتے تھے، سات پہلی رکعت میں اور پانچ دوسری رکعت میں۔

حضرت ابو سعید خدری فرماتے ہیں کہ عیدین میں پانچ اور سات تکبیرات ہیں، سات پہلی رکعت میں قرائت سے پہلے اور پانچ دوسری رکعت میں قرائت سے پہلے۔

حضرت ابن عمر رضی اللہ عنہما فرماتے ہیں کہ عیدین میں سات اور پانچ تکبیرات ہیں۔

حضرت محمد بن ہلال فرماتے ہیں کہ میں نے سالم بن عبد اللہ اور عبید اللہ بن عبداللہ کو مدینہ کے گورنر عبد الرحمن بن ضحاک کو عید الفطر کے دن حکم دیتے ہوئے سنا کہ پہلی رکعت میں سات تکبیرات کہیں اور پھر سورة الاعلیٰ پڑھیں اور دوسری رکعت میں پانچ تکبیرات کہیں اور سورة العلق پڑھیں۔

ثابت بن قیس فرماتے ہیں کہ میں نے حضرت عمر بن عبد العزیز کے پیچھے عید الفطر کی نماز پڑھی پہلی رکعت میں قرائت سے پہلے سات تکبیرات اور دوسری رکعت میں قرائت سے پہلے پانچ تکبیرات کہتے تھے۔

حضرت عمار بن ابی عمار فرماتے ہیں کہ ابن عباس رضی اللہ عنہما نے عید کی نماز میں بارہ تکبیرات کہیں، سات پہلی رکعت میں اور پانچ دوسری رکعت میں۔

حضرت شعبی اور حضرت مسیب فرماتے ہیں کہ عیدین کی نمازوں میں نو تکبیرات کہا کرتے تھے۔ پانچ پہلی رکعت میں اور چار دوسری رکعت میں۔ دونوں قرائتوں کے درمیان تکبیر نہیں ہے۔