مصنف ابن ابي شيبه

حضرت جبیر بن مطعم فرماتے ہیں کہ میں نے رسول اللہ صلی اللہ علیہ وآلہ وسلم کو مغرب میں سورة الطور کی تلاوت کرتے سنا ہے۔

حضرت ابن عباس رضی اللہ عنہما اپنی والدہ سے روایت کرتے ہیں کہ انہوں نے رسول اللہ صلی اللہ علیہ وآلہ وسلم کو مغرب میں سورۃ المرسلات کی تلاوت کرتے سنا ہے۔

حضرت زید یا حضرت ابو ایوب فرماتے ہیں کہ نبی کریم صلی اللہ علیہ وآلہ وسلم نے مغرب کی دونوں رکعتوں میں سورۃ الأعراف کی تلاوت فرمائی۔

حضرت عبدا للہ بن یزید فرماتے ہیں کہ رسول اللہ صلی اللہ علیہ وآلہ وسلم نے مغرب میں سورة التین کی تلاوت فرمائی۔

حضرت عمرو بن میمون کہتے ہیں کہ حضرت عمر نے ہمیں مغرب کی نماز پڑھائی، انہوں نے پہلی رکعت میں سورة التین اور دوسری میں سورة الفیل اور سورة القریش کی تلاوت فرمائی۔

حضرت زرارہ بن ابی اوفی فرماتے ہیں کہ حضرت ابو موسیٰ نے مجھے حضرت عمر کا خط پڑھایا جس میں لکھا تھا کہ مغرب کی نماز میں آخری مفصل سے تلاوت کرو۔

حضرت ابو عثمان نہدی کہتے ہیں کہ حضرت ابو مسعود نے ہمیں مغرب کی نماز پڑھائی اور اس میں سورۃ الاخلاص کی تلاوت کی۔ ان کی خوبصورت آواز سن کر میرا دل چاہتا تھا کہ وہ سورة البقرۃ کی تلاوت کریں۔

حضرت عبد اللہ بن حارث کہتے ہیں کہ حضرت ابن عباس رضی اللہ عنہما نے مغرب میں سورة الدخان کی تلاوت فرمائی۔

حضرت ابو نوفل کہتے ہیں کہ میں نے حضرت ابن عباس رضی اللہ عنہما کو مغرب میں سورة النصر کی تلاوت کرتے سنا ہے۔

حضرت عمرو بن مرہ کہتے ہیں کہ میں نے حضرت ابن عمر رضی اللہ عنہما کو مغرب میں سورة ق کی تلاوت کرتے سنا ہے۔

حضرت نافع فرماتے ہیں کہ حضرت ابن عمر رضی اللہ عنہما نے مغرب میں سورۃ یس کی تلاوت کی۔

حضرت نافع فرماتے ہیں کہ حضرت ابن عمر رضی اللہ عنہما نے مغرب میں سورة یس اور سورة النبأ کی تلاوت فرمائی۔

حسن فرماتے ہیں کہ حضرت عمران بن حصین مغرب میں سورۃ الزلزال اور سورۃ العادیات کی تلاوت فرمایا کرتے تھے۔

حضرت اسماعیل بن عبد الملک فرماتے ہیں کہ میں نے حضرت سعید بن جبیر کو مغرب میں (سورۃ الزلزال کی تلاوت کرتے ہوئے) ایک مرتبہ { تُنَبِّیئُ أَخْبَارَہَا } اور ایک مرتبہ { تُحَدِّثُ أَخْبَارَہَا } کہتے سنا ہے۔

حضرت محل کہتے ہیں کہ ابراہیم مغرب کی پہلی رکعت میں سورة القریش کی تلاوت کرتے تھے۔

حضرت ربیع کہتے ہیں کہ حسن مغرب میں ہمیشہ سورة الزلزال اور سورة العادیات کی تلاوت کیا کرتے تھے۔

حضرت جابر بن عبد اللہ رضی اللہ عنہ کہتے ہیں کہ حضرت معاذ نے کچھ لوگوں کو مغرب کی نماز پڑھائی، اتنے میں انصار کا ایک غلام جو اپنے اونٹ کا کچھ کام کررہا تھا وہاں سے گذرا اور جماعت میں شریک ہوگیا۔ حضرت معاذ نے قراءت بہت لمبی کردی، جس کی وجہ سے وہ غلام نماز توڑ کر اپنے اونٹ کی تلاش میں نکل کھڑا ہوا۔ جب یہ بات نبی کریم صلی اللہ علیہ وآلہ وسلم کو معلوم ہوئی تو آپ نے فرمایا ” اے معاذ ! کیا تم لوگوں کو دین سے دور کرنا چاہتے ہو ! تم میں سے کوئی مغرب میں سورة الاعلیٰ اور سورة الشمس نہ پڑھے “

حضرت نسیر بن ذعلوق فرماتے ہیں کہ حضرت ربیع بن خثیم مغرب میں قصار مفصل میں سے سورة الکافرون اور سورة الاخلاص پڑھا کرتے تھے۔

حضرت ضحاک بن عثمان کہتے ہیں کہ میں نے حضرت عمر بن عبد العزیز کو مغرب میں قصار مفصل سے تلاوت کرتے سنا ہے۔