مصنف ابن ابي شيبه

حضرت قطبہ بن مالک فرماتے ہیں کہ نبی کریم صلی اللہ علیہ وآلہ وسلم نے فجر کی نماز میں (سورۃ ق کی آیت نمبر ١٠ ) { وَالنَّخْلَ بَاسِقَاتٍ } سے تلاوت فرمائی۔

حضرت عمرو بن حریث کہتے ہیں کہ نبی کریم صلی اللہ علیہ وآلہ وسلم نے فجر کی نماز میں (سورۃ التکویر کی آیت نمبر ١٧) { وَاللَّیْلِ إذَا عَسْعَسَ } سے تلاوت فرمائی۔

حضرت سماک فرماتے ہیں کہ میں نے حضرت جابر بن سمرہ سے نبی کریم صلی اللہ علیہ وآلہ وسلم کی نماز کے بارے میں سوال کیا تو انہوں نے مجھے بتایا کہ نبی کریم صلی اللہ علیہ وآلہ وسلم فجر کی نماز میں سورة ق کی تلاوت کیا کرتے تھے۔

حضرت ابو برزہ فرماتے ہیں کہ نبی کریم صلی اللہ علیہ وآلہ وسلم فجر کی نماز میں ساٹھ سے سو تک آیات پڑھا کرتے تھے۔

حضرت انس رضی اللہ عنہ فرماتے ہیں کہ حضرت ابوب کرنے فجر کی نماز میں سورة البقرۃ کی تلاوت کی۔ جب نماز سے فارغ ہوئے تو حضرت عمرنے ان سے کہا کہ آپ تو سورج طلوع کروانے لگے تھے ! حضرت ابوبکر نے فرمایا کہ اگر سورج طلوع ہوجاتا تو وہ ہمیں غافل ہونے والوں میں سے نہ پاتا۔

حضرت احنف فرماتے ہیں کہ میں نے حضرت عمر کے پیچھے فجر کی نماز پڑھی، وہ فجر کی نماز میں سورة یونس اور سورة ہود وغیرہ کی تلاوت کیا کرتے تھے۔

حضرت زید بن وہب فرماتے ہیں کہ حضرت عمر نے فجر میں سورة الکہف کی تلاوت فرمائی۔

حضرت عبد اللہ بن عامر بن ربیعہ فرماتے ہیں کہ میں نے حضرت عمرکو فجر کی نماز میں سورة یوسف کی آہستہ رفتار سے تلاوت کرتے سنا ہے۔

حضرت ابن الفراصفہ اپنے والد سے روایت کرتے ہیں کہ میں نے سورة یوسف حضرت عمر کے پیچھے فجر کی نماز میں سیکھی ہے۔

حضرت ابو عمرو شیبانی فرماتے ہیں کہ حضرت عبد اللہ نے ہمیں فجر کی نماز پڑھائی، جس میں دو سورتوں کی تلاوت کی، دوسری سورت سورة بنی اسرائیل تھی۔

حضرت ادریس اودی اپنے والد سے روایت کرتے ہیں کہ میں نے حضرت علیکو فجر کی دوسری رکعت میں سورة الاعلیٰ کی تلاوت کرتے ہوئے سنا ہے۔

حضرت عبد اللہ بن شقیق فرماتے ہیں کہ میں نے حضرت ابوہریرہ کے پیچھے فجر کی نماز پڑھی، انہوں نے فجر میں سورۃ یونس اور سورة ہود کی تلاوت کی۔

حضرت عمرو بن میمون کہتے ہیں کہ میں نے حضرت معاذ بن جبل کے پیچھے یمن میں فجر کی نماز ادا کی، انہوں نے اس میں سورة النساء کی تلاوت کی۔ جب وہ اس آیت پر پہنچے { وَاتَّخَذَ اللَّہُ إبْرَاہِیمَ خَلِیلاً } تو پیچھے سے ایک آدمی نے کہا کہ ابراہیم کی والدہ کی آنکھ ٹھنڈی ہوگئی !

حضرت نافع فرماتے ہیں کہ حضرت ابن عمر رضی اللہ عنہما فجر کی نماز میں سورة یوسف اور سورة الکہف کی تلاوت کیا کرتے تھے۔

حضرت حارث بن سوید کہتے ہیں کہ ہمارے امام فجر میں ” مئین “ میں سے کسی سورت کی تلاوت کیا کرتے تھے۔

حضرت نعمان بن قیس فرماتے ہیں کہ حضرت عبیدہ فجر کی نماز میں سورة الرحمن اور اس کی مثل سورتوں کی تلاوت کیا کرتے تھے۔

حضرت عطاء بن سائب کہتے ہیں کہ میں نے حضرت عرفجہ کے پیچھے نما زپڑھی ہے، وہ اکثر فجر میں سورة المائدۃ پڑھا کرتے تھے۔

حضرت ابن ادریس کے دادا کہتے ہیں کہ میں نے حضرت علی رضی اللہ عنہ کے پیچھے فجر کی نماز پڑھی، انہوں نے اس میں سورة الاعلیٰ کی تلاوت کی۔

حضرت ابو سوار قاضی کہتے ہیں کہ میں نے ابن زبیر کے پیچھے فجر کی نماز پڑھی اور انہیں یہ آیات پڑھتے ہوئے سنا ہے { أَلَمْ تَرَ کَیْفَ فَعَلَ رَبُّک بِعَادٍ إرَمَ ذَاتِ الْعِمَادِ }

حضرت ولید بن جمیع کہتے ہیں کہ میں نے ابراہیم کے پیچھے نماز پڑھی ہے، وہ فجر کی نماز میں سورة یس اور اس جیسی سورتیں پڑھا کرتے تھے۔ وہ تیز قراءت کرنے والے تھے۔

حضرت ابو عبد الرحمن کہتے ہیں کہ میں نے حضرت علی رضی اللہ عنہ سے زیادہ قرآن کا عالم کوئی نہیں دیکھا۔ انہوں نے ہمیں فجر کی نماز پڑھائی اور اس میں سورة الانبیاء کی تلاوت کی۔ انہوں نے جب ستر آیات مکمل کیں تو ایک آیت چھوڑ دی اور اس کے بعد والی آیت پڑھ لی۔ پھر جب انہیں یاد آیا تو واپس گئے اور اسے پڑھا۔ پھر اس جگہ واپس ہوگئے جہاں سے پڑھ رہے تھے، جب انہیں اٹکن محسوس ہوئی۔

حضرت ضحاک بن عثمان کہتے ہیں کہ میں نے حضرت عمر بن عبد العزیز کو فجر کی نماز میں طوال مفصل میں سے دو سورتیں پڑھتے دیکھا ہے۔

حضرت ابو رافع کہتے ہیں کہ حضرت عمر فجر کی نماز میں سورة بقرہ کی سو آیات پڑھتے اور ان کے ساتھ مثانی میں سے کوئی سورت ملاتے یا مفصل کے شروع سے کچھ پڑھتے۔ اور اگر سورة آل عمران کی سو آیات پڑھتے تو ان کے ساتھ بھی مثانی میں سے کوئی سورت ملاتے یا مفصل کے شروع سے کچھ پڑھتے۔ ! سورة الحجرات سے لے کرآخرِ قرآن تک کی سورتوں کو ” مفصل “ کہا جاتا ہے۔” مفصل “ کی تین قسمیں ہیں : طوال، اوساط اور قصار۔ طوال مفصل سورة الحجرات سے لے کر سورة البروج تک، اوساط مفصل سورة الطارق سے سورة البینۃ تک اور قصار مفصل سورة القدر سے لے کر سورة الناس تک ہیں۔ مذکورہ روایت میں ” مفصل کے شروع “ سے مراد طوال مفصل کی سورتیں۔ ہیں۔

حضرت حصین بن سبرہ کہتے ہیں کہ میں نے حضرت عمر کے پیچھے نماز پڑھی ہے۔ انہوں نے پہلی رکعت میں سورة یوسف کی تلاوت کی، دوسری مرتبہ میں سورۃ النجم کی تلاوت کی ۔ پھر انہوں نے سجدہ کیا پھر جب کھڑے ہوئے تو سورة الزلزال کی تلاوت کی، پھر رکوع کیا۔

حضرت عبدا للہ بن شداد کہتے ہیں کہ فجر کی نماز میں، میں آخری صفوں میں تھا کہ میں نے حضرت عمر کے رونے کی آواز سنی، وہ اس آیت کی تلاوت کررہے تھے {إنَّمَا أَشْکُو بَثِّی وَحُزْنِی إلَی اللہِ }

حضرت علقمہ بن وقاص سے بھی یونہی منقول ہے۔

حضرت ابو حمزہ اعور کہتے ہیں کہ ابراہیم نے ہمیں جمعہ کے دن فجر کی نماز پڑھائی اور اس میں کہیعص کی تلاوت کی۔