مصنف ابن ابي شيبه

حسن فرماتے ہیں کہ نبی کریم صلی اللہ علیہ وآلہ وسلم نماز میں تین مرتبہ خاموشی اختیار فرماتے تھے تکبیر تحریمہ کہنے کے بعد سورة فاتحہ پڑھنے تک سورة فاتحہ پڑھنے کے بعد سورت شروع کرنے سے پہلے سورت ختم کرنے کے بعد رکوع کی تکبیر کہنے سے پہلے۔

حضرت ابوہریرہ فرماتے ہیں کہ نبی کریم صلی اللہ علیہ وآلہ وسلم تکبیر کہنے کے بعد تکبیر اور قراءت کے درمیان تھوڑی دیر خاموش رہتے تھے۔

حضرت عمرو بن مہاجر کہتے ہیں کہ حضرت عمر بن عبد العزیز نماز میں دو وقفے کرتے تھے ایک تکبیر کہنے کے بعد اور دوسرا سورة فاتحہ سے فارغ ہونے کے بعد۔

حضرت سمرہ بن جندب فرماتے ہیں کہ نبی کریم صلی اللہ علیہ وآلہ وسلم دو مرتبہ خاموشی اختیار فرماتے تھے ایک تو نماز شروع کرکے اور دوسری قراءت سے فارغ ہونے کے بعد ۔ یہ روایت حضرت عمران بن حصین کو عجیب لگی، انہوں نے اس بارے میں خط کے ذریعے حضرت ابی بن کعب کی رائے دریافت کی تو انہوں نے فرمایا کہ حضرت سمرہ سچ کہتے ہیں۔

حضرت مغیرہ فرماتے ہیں کہ ابراہیم جب تکبیر کہتے تو تھوڑی دیر خاموش رہتے اور پھر جب سورة فاتحہ ختم کرتے تو پھر بھی تھوڑی دیر خاموش رہتے۔ پھر جب دوسری رکعت کے لئے اٹھتے تو خاموش نہ رہتے اور سورة فاتحہ شروع کردیتے۔

حسن فرماتے ہیں کہ امام دو مرتبہ خاموشی اختیار کرے گا۔ ایک مرتبہ قراءت سے پہلے تکبیر کہنے کے بعد اور دوسری مرتبہ رکوع میں جانے سے پہلے سورت سے فارغ ہونے کے بعد۔

حضرت عبد الرحمن اعرج کہتے ہیں کہ میں نے حضرت ابوہریرہ کے ساتھ نماز پڑھی، جب وہ تکبیر کہتے تو تھوڑی دیر خاموش رہتے پھر سورة فاتحہ شروع کرتے۔