مصنف ابن ابي شيبه

حضرت بکر بن عبد اللہ کہتے ہیں کہ حضرت عمر اس بات کو مکروہ خیال فرماتے تھے کہ آدمی لکڑی پر سجدہ کرے۔

حضرت علقمہ فرماتے ہیں کہ حضرت عبد اللہ اپنے بھائی عتبہ کی عیادت کے لئے گئے، دیکھا کہ وہ لکڑی کے سہارے نماز پڑھ رہے ہیں۔ انہوں نے لکڑی کو اٹھا کر پھینک دیا اور فرمایا کہ یہ چیز شیطان کی طرف سے پیدا کی گئی ہے۔ تم اپنے چہرے کو زمین پر رکھو اور اگر اس کی طاقت نہ ہو تو اشارے سے نماز پڑھ لو۔

حضرت ابن عون کہتے ہیں کہ محمد سے پوچھا گیا کہ کیا لکڑی پر نماز پڑھنا جائز ہے ؟ آپ نے اسے مکروہ خیال فرمایا۔

حضرت شعبی کہتے ہیں کہ حضرت ابن مسعوداپنے بھائی عتبہ کی عیادت کے لئے تشریف لے گئے، وہ ایک مسواک کی لکڑی پر سجدہ کررہے تھے، حضرت ابن مسعود نے اس لکڑی کو پھینک دیا اور فرمایا کہ اشارے سے نماز پڑھو۔

ابراہیم فرماتے ہیں کہ حسن لکڑی پر نماز پڑھنے کو مکروہ خیال فرماتے تھے۔