المنتقى ابن الجارود

سیدنا عبد الله بن عمرو رضی الله عنہما بیان کرتے ہیں کہ رسول الله صلی الله علیہ وسلم نے فرمایا: سن لیں! ہر وہ خون (حسب و نسب) یا مال یا کوئی بھی کام جو زمانہ جاہلیت میں بطور فخر سمجھا جاتا تھا، میرے قدموں کے نیچے ہے (اس کی کوئی اہمیت نہیں) بجز حاجیوں کو پانی پلانے اور اس کے گھر کی حفاظت کرنے کے۔ پھر فرمایا: سن لیں! قتل خطأ جو کوڑے اور لاٹھی سے ہو، کی دیت سو اونٹ ہے، ان میں چالیس حاملہ (اونٹنیاں) ہوں گی۔

سیدنا ابو شریح خزاعی رضی الله عنہ بیان کرتے ہیں کہ میں نے رسول الله صلی الله علیہ وسلم کو فرماتے ہوئے سنا: جس کو قتل کیا جائے یا زخمی کیا جائے تو اس کے ورثا کو تین میں سے ایک چیز اختیار کرنے کا حق ہے، قصاص لے لیں، معاف کر دیں یا پھر دیت لے لیں، اگر وہ کسی چوتھی چیز کا ارادہ کریں، تو ان کا ہاتھ پکڑ لیں، جو ان میں سے کوئی حق لینے کے بعد بھی حد سے تجاوز کرے گا، تو وہ ہمیشہ ہمیشہ جہنم میں رہے گا۔

سیدنا عبد الله بن عباس رضی الله عنہما بیان کرتے ہیں کہ بنی اسرائیل میں صرف قصاص تھا دیت نہیں تھی، الله تعالیٰ نے اس امت (محمدیہ) سے ارشاد فرمایا: ﴿يَا أَيُّهَا الَّذِينَ آمَنُوا كُتِبَ عَلَيْكُمُ الْقِصَاصُ فِي الْقَتْلَى الْحُرُّ بِالْحُرِّ وَالْعَبْدُ بِالْعَبْدِ وَالْأُنْثَى بِالْأُنْثَى فَمَنْ عُفِيَ لَهُ مِنْ أَخِيهِ شَيْءٌ﴾ (البقرة: 178) (اے ایمان والو! تم پر مقتولین میں قصاص فرض کر دیا گیا ہے، آزاد کے بدلے آزاد، غلام کے بدلے غلام، عورت کے بدلے عورت ہے، جسے اس کے بھائی (مقتول کے وارث) کی طرف سے معاف کر دیا جائے) سیدنا عبد الله بن عباس رضی الله عنہما فرماتے ہیں: معاف کرنے سے مراد یہ ہے کہ قتل عمد میں دیت لے لے، ﴿فَاتِبَاعٌ بِالْمَعْرُوفِ وَأَدَاءٌ إِلَيْهِ بِإِحْسَانٍ﴾ (البقرة: 178) (تو دستور کے مطابق پیروی کرنی ہے اور اچھے طریقے سے ادائیگی کرنی ہے) دیت لینے والے پر لازم ہے کہ دستور کے مطابق پیروی کرے اور دیت دینے والے پر لازم ہے کہ اچھے طریقے سے ادا کر دے ﴿ذَلِكَ تَخْفِيفٌ مِنْ رَبِّكُمْ﴾ (البقرة: 178) (یہ تمہارے رب کی طرف سے نرمی ہے) اس کی بہ نسبت جو تم سے پہلے لوگوں پر (قصاص) فرض کیا گیا تھا ﴿فَمَنِ اعْتَدَى بَعْدَ ذَلِكَ فَلَهُ عَذَابٌ أَلِيمٌ﴾ (البقرة: 178) (اس کے بعد جو زیادتی کرے گا، تو اس کے لیے المناک عذاب ہے)۔

سیدنا ابو ہریرہ رضی الله عنہ بیان کرتے ہیں کہ قبیلہ ہذیل کی دو عورتیں لڑ پڑیں، ایک نے دوسری کو پتھر مارا اور پیٹ کے بچے سمیت اسے قتل کر دیا، وہ رسول الله صلی الله علیہ وسلم کے پاس جھگڑا لے کر آئے، تو آپ نے یوں فیصلہ کیا کہ اس کے پیٹ کے بچے کی دیت غرّہ یعنی غلام یا لونڈی ہے اور آپ نے (مقتولہ) عورت کی دیت قاتلہ کے عاقلہ پر ڈال دی اور مقتولہ کے بیٹے کو دیگر ورثاء سمیت اس کا وارث ٹھہرایا، حمل بن نابغہ ہذلی کہنے لگا: میں اس بچے کی دیت کیوں ادا کروں؟ جس نے نہ کھایا نہ پیا، نہ بولا نہ چلایا، ایسے بچے کا خون تو رائیگاں ہے۔ اس کی سجع کلامی کو دیکھ کر رسول الله صلی الله علیہ وسلم نے فرمایا: یہ تو کاہنوں کا بھائی ہے۔

سیدنا ابو حَدْرَدٍ رضی الله عنہ بیان کرتے ہیں کہ رسول الله صلی الله علیہ وسلم نے ہمیں ایک سرّیہ میں بھیجا، جس میں میں بھی شامل تھا اور ابو قتادہ انصاری اور مُحَلِّم بن جثامة بن قیس بھی شامل تھے، ہم جا رہے تھے کہ ہمارے پاس سے عامر بن الأضبط أشجعی گزرا اور اس نے ہمیں سلام کا اسلامی تحیہ پیش کیا، ہم نے اسے قتل نہ کیا، پھر مُحَلِّم بن جثامة نے حملہ کر کے اسے قتل کر دیا اور اس کا اونٹ اور رطب (تازہ کھجوریں) جو اس کے پاس تھے، چھین لیے، جب ہم رسول الله صلی الله علیہ وسلم کے پاس آئے، تو ہمارے متعلق قرآن اترا: ﴿يَا أَيُّهَا الَّذِينَ آمَنُوا إِذَا ضَرَبْتُمْ فِي سَبِيلِ اللهِ فَتَبَيَّنُوا...﴾ (النساء: 94) آخر آیت تک۔ عروہ بن زبیر کہتے ہیں: میرے باپ اور دادا غزوہ حنین میں رسول الله صلی الله علیہ وسلم کے ساتھ تھے، انہوں نے مجھے بتایا: رسول الله صلی الله علیہ وسلم نے ظہر کی نماز ادا کی پھر درخت کے سائے میں بیٹھ گئے، اقرع بن حابس اور عُيَيْنَة بن بدر آپ کے سامنے کھڑے ہو گئے، عُيَيْنَة أشجعی کے خون کا مطالبہ کر رہے تھے اور اقرع اس کا دفاع کر رہے تھے، چنانچہ وہ دونوں رسول الله صلی الله علیہ وسلم کے سامنے کافی دیر جھگڑتے رہے، رسول الله صلی الله علیہ وسلم نے فرمایا: دیت کے پچاس اونٹ دوران سفر لے لو اور پچاس واپس جا کر، رسول الله صلی الله علیہ وسلم کہتے رہے حتیٰ کہ وہ دیت پر راضی ہو گئے، جب وہ دیت لینے پر راضی ہو گئے تو کہنے لگے: تمہارا ساتھی (مُحَلِّم) کہاں ہے؟ تاکہ رسول الله صلی الله علیہ وسلم اس کے لیے استغفار کر دیں، ایک لمبا آدمی کھڑا ہوا جس نے حُلّہ (جوڑا) پہنا ہوا تھا اور قتل ہونے کے لیے تیار تھا، وہ رسول الله صلی الله علیہ وسلم کے سامنے بیٹھ گیا، تو آپ نے پوچھا: نام کیا ہے؟ اس نے کہا: میں مُحَلِّم بن جثامة ہوں، رسول الله صلی الله علیہ وسلم نے فرمایا: اللہ مُحَلِّم بن جثامة کو معاف نہ کرے۔ چنانچہ وہ اپنی چادر سے آنسو پونچھتا ہوا اٹھ کھڑا ہوا۔

سیدنا مغیرہ بن شعبہ رضی الله عنہ بیان کرتے ہیں کہ دو عورتیں سوتنیں تھیں، ان میں سے ایک نے دوسری کو پتھر یا خیمے کی لکڑی ماری اور اس کے پیٹ کا بچہ گرا دیا، رسول الله صلی الله علیہ وسلم نے فیصلہ کیا کہ پیٹ کے بچے کی دیت غرّہ یعنی غلام یا لونڈی ہے اور آپ نے دیت عورت کے عصبہ پر ڈال دی۔

سیدنا جابر رضی الله عنہ بیان کرتے ہیں کہ نبی کریم صلی الله علیہ وسلم نے فرمایا: ہر خاندان پر دیت ہے۔

سیدنا عبد الله بن عباس رضی الله عنہما بیان کرتے ہیں کہ رسول الله صلی الله علیہ وسلم نے فرمایا: ہاتھوں اور پاؤں کی انگلیوں کی دیت برابر ہے اور ہر انگلی کی دیت دس اونٹ ہے۔

سیدنا عبد الله بن عمرو رضی الله عنہما بیان کرتے ہیں کہ رسول الله صلی الله علیہ وسلم نے فرمایا: انگلیوں میں دس دس اونٹ (دیت) ہے۔

سیدنا عبد الله بن عباس رضی الله عنہما بیان کرتے ہیں کہ رسول الله صلی الله علیہ وسلم نے انگوٹھے اور چھوٹی انگلی کو اکٹھا کر کے فرمایا: ان دونوں کی دیت برابر ہے۔

سیدنا عبد الله بن عباس رضی الله عنہما بیان کرتے ہیں کہ رسول الله صلی الله علیہ وسلم نے فرمایا: یہ اور یہ یعنی انگوٹھا اور چھوٹی انگلی برابر ہیں، یہ اور یہ یعنی ڈاڑھ اور سامنے والا دانت (دیت میں) برابر ہیں۔

سیدنا محمد بن عمر بن حزم بیان کرتے ہیں کہ نبی کریم صلی الله علیہ وسلم نے ان کے لیے ایک تحریر لکھ کر دی، جس میں تھا کہ ٹانگ کی دیت پچاس اونٹ ہے، ہاتھ کی دیت پچاس اونٹ ہے، ہاتھوں اور پاؤں کی انگلیوں میں سے ہر انگلی کی دیت دس اونٹ ہے، ناک اگر پوری کاٹی جائے تو اس کی دیت سو اونٹ ہے اور دانت کی دیت پانچ اونٹ ہے۔

سیدنا عبد الله بن عمرو بن العاص رضی الله عنہما بیان کرتے ہیں کہ نبی کریم صلی الله علیہ وسلم نے فرمایا: انگلیوں میں دس دس اونٹ (دیت) ہے اور مواضح (ایسا زخم جس سے ہڈی نظر آ جائے) کی دیت پانچ پانچ اونٹ ہے۔

سیدنا محمد بن عمرو بن حزم بیان کرتے ہیں کہ رسول الله صلی الله علیہ وسلم نے موضحہ (ہڈی نظر آنے والے زخم) میں پانچ اونٹ اور مأمومہ (دماغی زخم) میں ایک تہائی دیت دینے کا فیصلہ کیا تھا۔

سیدنا ابو ہریرہ رضی الله عنہ بیان کرتے ہیں کہ سیدنا سعد بن عبادہ رضی الله عنہ نے رسول الله صلی الله علیہ وسلم سے پوچھا: اگر میں اپنی بیوی کے ساتھ کوئی غیر محرم مرد دیکھ لوں تو کیا چار گواہ لانے تک اسے مہلت دوں؟ فرمایا: جی ہاں۔

سیدنا عبد الله بن عمرو بن العاص رضی الله عنہما بیان کرتے ہیں کہ بنو مدلج کے ایک آدمی کے پاس ایک لونڈی تھی، جس سے اس کا ایک لڑکا تھا، وہ آدمی اس لونڈی سے خدمت کروایا کرتا تھا، جب لڑکا جوان ہو گیا تو اس آدمی نے ایک دن لونڈی کو بلا کر کہا کہ فلاں فلاں کام کر دو، لڑکا کہنے لگا: وہ آپ کے پاس نہیں آئیں گی، کب تک آپ میری ماں پر حکم چلاتے رہیں گے؟ اس کے باپ نے غصے میں آکر اس کی طرف تلوار پھینکی جو اس کی ٹانگ یا اس کے علاوہ کسی جگہ پر لگی اور اس کو کاٹ دیا، لڑکے کا خون بہہ نکلا اور وہ مر گیا، وہ شخص اپنی قوم کے ایک گروہ کے ساتھ سیدنا عمر رضی الله عنہ کے پاس آیا تو آپ نے فرمایا: اے اپنی جان کے دشمن! تو نے خود ہی اپنے بیٹے کو قتل کر دیا ہے، اگر میں نے رسول الله صلی الله علیہ وسلم سے یہ نہ سنا ہوتا کہ بیٹے کے بدلے باپ کو قتل نہ کیا جائے تو میں تجھے قتل کر دیتا، اس کی دیت ادا کرو۔ راوی کہتے ہیں: وہ آدمی ایک سو بیس یا تیس اونٹ لے کر آپ کے پاس آیا تو آپ نے ان میں سے سو اونٹ پسند کر لیے اور باپ کے علاوہ باقی ورثاء میں تقسیم کر دیے۔

سیدنا سہل بن سعد رضی الله عنہ بیان کرتے ہیں کہ ایک شخص نے نبی کریم صلی الله علیہ وسلم کے کسی حجرے میں جھانکا، نبی کریم صلی الله علیہ وسلم کے پاس ایک مدرى (پشت خار) تھی جس سے آپ اپنے سر میں خارش کر رہے تھے، فرمایا: اگر مجھے پتہ چل جاتا کہ آپ مجھے دیکھ رہے ہیں تو میں یہ مدرى آپ کی آنکھوں میں چھو دیتا، اجازت لینے کا حکم نظر کی وجہ سے ہی تو رکھا گیا ہے۔

سیدنا ابو ہریرہ رضی الله عنہ بیان کرتے ہیں کہ نبی کریم صلی الله علیہ وسلم نے فرمایا: جو بغیر اجازت لوگوں کے گھروں میں جھانکے اور وہ اس کی آنکھ پھوڑ دیں تو اسے نہ دیت ملے گی اور نہ قصاص ملے گا۔

سیدنا ابو ہریرہ رضی الله عنہ بیان کرتے ہیں کہ رسول الله صلی الله علیہ وسلم نے فرمایا: اگر کوئی آدمی آپ کے گھر میں جھانکے اور آپ کنکری مار کے اس کی آنکھ پھوڑ دیں تو آپ پر کوئی گناہ نہیں ہے۔

سیدنا یعلى بن امیہ رضی الله عنہ بیان کرتے ہیں کہ میں رسول الله صلی الله علیہ وسلم کے ساتھ غزوہ عسرہ (غزوہ تبوک) میں شامل ہوا تھا اور یہ میرا ایسا عمل تھا جس پر مجھے سب سے زیادہ بھروسہ تھا، میرا ایک غلام تھا جو کسی آدمی سے لڑ پڑا، ان میں سے ایک نے اپنے ساتھی کا ہاتھ چبا دیا، اس نے اپنی انگلی باہر کھینچی تو چبانے والے کا سامنے والا دانت گر گیا، وہ رسول الله صلی الله علیہ وسلم کے پاس فیصلے کے لیے آیا تو آپ نے اس کا دانت رائیگاں قرار دیا۔ امام عطاء بن ابی رباح کہتے ہیں: میرے خیال میں صفوان نے بیان کیا تھا کہ رسول الله صلی الله علیہ وسلم نے فرمایا: کیا وہ اپنا ہاتھ تیرے منہ میں رہنے دیتا کہ تو اسے اونٹ کی طرح چبا جائے۔

سیدنا عبد الله بن عمرو رضی الله عنہ بیان کرتے ہیں کہ فتح مکہ والے سال جب رسول الله صلی الله علیہ وسلم مکہ میں داخل ہوئے تو آپ صلی الله علیہ وسلم نے کھڑے ہو کر خطبہ دیا۔ ابو محمد کہتے ہیں: میں نے وہ خطبہ کتاب السیر میں لکھا ہے۔

سیدنا ابو جحیفہ رضی الله عنہ بیان کرتے ہیں کہ میں نے سیدنا علی رضی الله عنہ سے پوچھا: کیا آپ کے پاس قرآن کے علاوہ بھی رسول الله صلی الله علیہ وسلم سے کوئی چیز (فرمان وغیرہ) موجود ہے؟ تو انہوں نے کہا: اس ذات کی قسم جس نے دانے کو پھاڑا اور روح کو پیدا کیا! اس صحیفے اور کتاب الله میں اللہ تعالیٰ کی عطا کردہ سمجھ کے علاوہ کچھ نہیں ہے، میں نے پوچھا: اس صحیفے میں کیا ہے؟ فرمایا: دیت (کے احکام)، قیدیوں کو آزاد کرنا اور یہ کہ کافر کے بدلے مسلمان کو قتل نہ کیا جائے۔

سیدنا ابو ہریرہ رضی الله عنہ بیان کرتے ہیں کہ رسول الله صلی الله علیہ وسلم نے فرمایا: چوپایوں سے زخم آجانے پر کوئی دیت نہیں، کان میں گر کر مرنے والے کی کوئی دیت نہیں، کنویں میں گر کر مرنے والے کی کوئی دیت نہیں اور رکاز (مدفون خزانہ) میں خمس ہے۔

سیدنا سعید بن مسیب اور حرام بن سعد بیان کرتے ہیں کہ براء کی اونٹنی کسی قوم کے باغ میں گھس گئی اور اسے خراب کر دیا تو رسول الله صلی الله علیہ وسلم نے یہ فیصلہ فرمایا کہ دن کے وقت کھیتی کی حفاظت کرنا مالک کی ذمہ داری ہے اور رات کے وقت جانور جو نقصان کریں وہ جانوروں کے مالکوں کے ذمہ ہے۔ ابن مقری نے اسی مفہوم کو چند الفاظ کی تبدیلی سے بھی بیان کیا ہے۔