المنتقى ابن الجارود

سیدنا عبداللہ بن عمر رضی اللہ عنہما بیان کرتے ہیں کہ میں نے نبی کریم صلی اللہ علیہ وسلم کے ساتھ ظہر سے پہلے اور بعد میں دو دو رکعتیں، مغرب کے بعد گھر میں دو رکعتیں اور عشا کے بعد گھر میں دو رکعتیں ادا کی ہیں۔ فرماتے ہیں: سیدہ حفصہ رضی اللہ عنہما نے مجھے بتایا: جب فجر طلوع ہو جاتی اور موذن نماز فجر کے لیے اذان کہتا، تو اس وقت آپ دو رکعت پڑھا کرتے تھے اور یہ وہ وقت تھا، جب آپ صلی اللہ علیہ وسلم کے پاس کوئی نہیں آیا کرتا تھا، ایوب کہتے ہیں: میرا خیال ہے کہ یہ دو رکعت ہلکی سی پڑھا کرتے تھے۔ اسی طرح جمعہ کے بعد گھر میں دو رکعت پڑھا کرتے تھے۔

عبدالله بن شقیق رحمہ اللہ کہتے ہیں کہ میں نے سیدہ عائشہ رضی اللہ عنہا سے رسول اللہ صلی اللہ علیہ وسلم کی نفل نماز کے متعلق پوچھا، فرمایا: آپ میرے گھر میں ظہر سے پہلے چار رکعت پڑھتے تھے، پھر تشریف لے جاتے اور لوگوں کو نماز پڑھاتے، پھر میرے گھر واپس آ کر دو رکعت ادا کرتے۔

سیدنا عبد اللہ بن عمر رضی اللہ عنہما بیان کرتے ہیں کہ نبی کریم صلی اللہ علیہ وسلم نے فرمایا: دن اور رات کی نماز دو دو رکعت ہے۔

سیدہ عائشہ رضی اللہ عنہا بیان کرتی ہیں کہ رسول اللہ صلی اللہ علیہ وسلم رات کو گیارہ رکعت پڑھا کرتے تھے، جن میں ایک وتر شامل ہوتا تھا، جب نماز سے فارغ ہوتے تو دائیں کروٹ لیٹ جاتے، حتی کہ جب مؤذن (نماز کی اطلاع دینے) آتا، تو مختصر سی دو رکعت ادا کرتے۔