صحيح ابن خزيمه

سیدہ عائشہ رضی اللہ عنہا سے روایت ہے کہ نبی اکرم صلی اللہ علیہ وسلم نماز میں اپنی دائیں جانب تھوڑا سا جُھکتے ہوئے اپنے چہرے کی جانب ( ‏‏‏‏یعنی سامنے ) ایک سلام پھیرتے تھے ۔

سیدہ عائشہ رضی اللہ عنہا سے روایت ہے کہ وہ اپنے چہرے کے سامنے « السَّلَامُ عَلَيْكُمْ » کہتے ہوئے ایک ہی سلام کہتی تھیں ۔

حضرت ہشام بن عروہ اپنے والد سیدنا عروہ رضی اللہ عنہ سے روایت کرتے ہیں کہ وہ « السَّلَامُ عَلَيْكُمْ » کہتے ہوئے ایک ہی سلام پھیرتے تھے ۔

حضرت قاسم رحمہ اللہ بیان کرتے ہیں کہ میں نے سیدہ عائشہ رضی اللہ عنہا کو ایک سلام پھیرتے ہوئے دیکھا ہے ۔ امام ابوبکر رحمہ اللہ اپنے استاد محترم جناب بندار کی سند سے سیدنا عبید اللہ رضی اللہ عنہ سے اسی کی مثل روایت بیان کرتے ہیں ، اور اس میں یہ اضافہ بیان کیا ہے کہ اور وہ ( سیدہ عائشہ رضی اللہ عنہا ) سلام پھیرتے وقت اپنی دائیں اور بائیں جانب التفات نہیں کرتی تھیں ۔