الفتح الربانی

فوائد: … کیا بات ہے نبی کریم صلی اللہ علیہ وآلہ وسلم کی اس محبت کی، جو اللہ تعالیٰ نے صحابۂ کرام کے دلوں میں ودیعت کر دی تھی، اگر نبی کریم صلی اللہ علیہ وآلہ وسلم کے دفاع میں جان کا نذرانہ پیش کرنا پڑ جاتا تو یہ ان نفوسِ قدسیہ کے لیے کوئی مشکل مرحلہ نہیں ہوتا تھا۔ سیدنا ابو طلحہ انصاری رضی اللہ عنہ کا نام زید بن سہل بن اسود بن حرام ہے، انصار کے قبیلہ خزرج سے ان کا تعلق ہے، بدر اور اس کے بعد کے تمام معرکوں میں شریک رہے، یہ سیدنا انس رضی اللہ عنہ کی والدہ سیدہ ام سلیم رضی اللہ عنہا کے شوہر ہیں،جب سیدنا ابو طلحہ نے سیدہ ام سلیم کو نکاح کا پیغام بھیجا تو انھوں نے نے جواباً کہا: آپ جیسے آدمی کو رد تو نہیں کرنا چاہیے، لیکن وجہ یہ ہے کہ میں مسلمان ہوں اور تم کا فر ہو، اس لیے تم میرے لیے حلال نہیں ہو، اگر تم اسلام لے آؤ تو یہی میرا مہر ہوگا، چنانچہ وہ مسلمان ہوگئے اور ان کا یہی مہر قرار پایا۔ ان کی وفات ۳۴ھ میں ہوئی اور سیدنا عثمان رضی اللہ عنہ نے ان کی نماز جنازہ پڑھائی۔ ایک روایت کے مطابق یہ نبی کریم صلی اللہ علیہ وآلہ وسلم کے بعد چالیس برس حیات رہے۔سیدنا انس رضی اللہ عنہ سے مروی ہے کہ ایک غزوہ کے دوران ایک سمندر میں ان کی وفات ہوئی، ان کی تدفین کے لیے سات دن بعد ایک جزیرہ میں جگہ مل سکی۔ اس وقت تک ان کے جسم میں کسی قسم کا تغیر نہ آیا تھا۔

فوائد: … سیدنا ابو طلحہ رضی اللہ عنہ کی آواز میں رعب اور دبدبہ تھا، جس سے دشمن سہم جاتے تھے اور وہ سمجھتے تھے کہ واقعی کسی جنگجو کی آواز آ رہی ہے۔

فوائد: … قابل توجہ بات ہے کہ صحیح بخاری کی روایت میں اس روایت کے ابتدائی الفاظ یہ ہیں: کَانَ أَبُوْطَلْحَۃَ لَا یَصُوْمُ عَلٰی عَہْدِ النَّبِیِّ صلی اللہ علیہ وآلہ وسلم مِنْ اَجْلِ الْغَزْوَ۔ (سیدنا ابو طلحہ رضی اللہ عنہ جہاد کی وجہ سے نبی کریم صلی اللہ علیہ وآلہ وسلم کے عہد میں روزہ نہیں رکھا کرتے تھے)۔ اس روایت سے معلوم ہوتا ہے کہ مسند احمد کی اس حدیث کے الفاظ یُکْثِرُ دراصل لَایُکْثِرُ تھے، لَا ساقط ہو گیا،یعنی سیدنا ابو طلحہ رضی اللہ عنہ عہدِ نبوی میں جہادی مصروفیات کی وجہ سے زیادہ روزے نہیں رکھا کرتے تھے۔