الفتح الربانی

فوائد: … خود کشی حرام ہے، دنیا میں کوئی ایسی تکلیف اور آزمائش نہیں ہے، جس کی بنا پر خود کشی کو جائز سمجھا جا سکے، جن صحابہ کو اسلام کے جرم کی وجہ سے سنگین آزمائشوں کی بھٹیوں سے گزرنا پڑا، ان کی مثالیں واضح ہیں، اللہ تعالی بناتِ اسلام کی عزت و حرمت کو محفوظ فرمائے، جب ان کے ساتھ زیادتی کی جاتی ہے تو وہ خود کشی کو ترجیح دینے لگتی ہیں، لیکن ایسا کرنا درست نہیں ہے، اس زیادتی میں سرے سے ان کا گناہ ہی نہیں ہے، ان کو اپنا معاملہ اللہ تعالی کے سپرد کر کے صبر کرنا چاہیے، اللہ تعالی ایسے مجرموں کو ہدایت دے دے، وگرنہ ان کو ہلاک و برباد کر دے۔ (آمین)دوسری نصوص سے معلوم ہوتا ہے کہ خود کشی مسلمان کے لیے قابل معافی جرم ہے، ایک دلیل درج ذیل ہے: فَلَمَّا ہَاجَرَ النَّبِیُّV إِلَی الْمَدِینَۃِ ہَاجَرَ إِلَیْہِ الطُّفَیْلُ بْنُ عَمْرٍو وَہَاجَرَ مَعَہُ رَجُلٌ مِنْ قَوْمِہِ
فَاجْتَوَوُا الْمَدِینَۃَ فَمَرِضَ فَجَزِعَ فَأَخَذَ مَشَاقِصَ لَہُ فَقَطَعَ بِہَا بَرَاجِمَہُ فَشَخَبَتْ یَدَاہُ حَتّٰی مَاتَ فَرَآہُ الطُّفَیْلُ بْنُ عَمْرٍو فِی مَنَامِہِ فَرَآہُ وَہَیْئَتُہُ حَسَنَۃٌ وَرَآہُ مُغَطِّیًایَدَیْہِ۔ فَقَالَ لَہُ: ((مَا صَنَعَ بِکَ رَبُّکَ۔)) فَقَالَ غَفَرَ لِی بِہِجْرَتِی إِلَی نَبِیِّہِV، فَقَالَ: مَا لِی أَرَاکَ مُغَطِّیًایَدَیْکَ؟ قَالَ: قِیلَ لِی: لَنْ نُصْلِحَ مِنْکَ مَا أَفْسَدْتَ، فَقَصَّہَا الطُّفَیْلُ عَلٰی رَسُولِ اللَّہِV فَقَالَ رَسُولُ اللَّہِ صَلَّی اللَّہُ عَلَیْہِ وَسَلَّمَ: ((اللَّہُمَّ وَلِیَدَیْہِ فَاغْفِرْ۔)) … ’’جب نبی کریم صلی اللہ علیہ وسلم نے مدینہ منورہ کی طرف ہجرت کی تو سیدنا طفیل بن عمرو رضی اللہ عنہ نے بھی ہجرت کی اور ان کے ساتھ ایک آدمی بھی تھا، پس ان لوگوں نے مدینہ منورہ کی آب و فضا کو ناموافق پایا اور وہ آدمی بیمار ہو گیا اور بے صبری کا مظاہرہ کرتے ہوئے اس نے پھل پکڑا اور اپنی انگلیوں کے جوڑوں کو کاٹ دیا، خون بہتا رہا، یہاں تک کہ وہ بندہ مر گیا، اس کے بعد سیدنا طفیل نے اس کو خواب میں اس طرح دیکھا کہ اس کی حالت بہت اچھی تھی، لیکن اس نے دونوں ہاتھوں کو ڈھانپا ہوا تھا، سیدنا طفیل رضی اللہ عنہ نے اس سے کہا: تیرے ربّ نے تیرے ساتھ کیا سلوک کیا ہے؟ اس نے کہا: نبی کریم صلی اللہ علیہ وسلم کی طرف میری ہجرت کی وجہ سے اللہ تعالی نے مجھے بخش دیا ہے، سیدنا طفیل نے کہا: ہاتھوں کو کیوں ڈھانپا ہوا ہے؟ انھوں نے کہا: مجھے کہا گیا کہ جو چیز تو نے خود خراب کی ہے، ہم اس کی اصلاح نہیں کریں گے۔‘‘ پھر جب سیدنا طفیل نے نبی کریم کو خواب والا یہ واقعہ سنایا تو آپ صلی اللہ علیہ وسلم نے فرمایا: ’’اے اللہ اس کے ہاتھوں کو بھی بخش دے۔‘‘ (صحیح مسلم: ۱۱۶)
ہم جس حدیث کی شرح بیان کر رہے ہیں، اس کی اور اس طرح کی دوسری احادیث کی درج ذیل تاویلات کی جا سکتی ہیں: (۱) ان میں زجرو توبیخ کا بیان ہے تاکہ خود کشی کی قباحت و شناعت واضح ہو سکے۔
(۲) اگر اللہ تعالی ایسے شخص کو کامل سزا دینا چاہے تو وہ اسی سزا کا مستحق ہو گا، لیکن اللہ تعالی اپنے مؤحد بندوں پر کرم کرے گا اور ان کو کچھ عرصہ کے بعد جہنم سے نکال لے گا۔
(۳) ہمیشگی سے مراد طویل زمانہ ہے۔

فوائد: … یہ حدیث صحیح بخاری (۳۴۶۳) اور صحیح مسلم(۱۱۳) میں سیدنا جندب رضی اللہ عنہ سے ان الفاظ کے ساتھ مروی ہے کہ رسول اللہ صلی اللہ علیہ وسلم نے فرمایا: ((کَانَ فِیمَنْ کَانَ قَبْلَکُمْ رَجُلٌ بِہِ جُرْحٌ فَجَزِعَ فَأَخَذَ سِکِّینًا فَحَزَّ بِہَا یَدَہُ فَمَا رَقَأَ الدَّمُ حَتّٰی مَاتَ، قَالَ اللَّہُ تَعَالٰی بَادَرَنِی عَبْدِی بِنَفْسِہِ حَرَّمْتُ عَلَیْہِ الْجَنَّۃَ۔)) … ’’تم سے پہلے ایک آدمی تھا، اس کو کوئی زخم آ گیا، لیکن اس نے بے صبری کی اور چھری لے کر اپنے ہاتھ کو کاٹ دیا، پس خون نہ رکا، یہاں تک کہ وہ مر گیا، اللہ تعالی نے کہا: میرے بندے نے اپنے نفس کے معاملے میں مجھ سے سبقت لینا چاہاہے، پس میں نے اس پر جنت کو حرام کر دیا ہے۔‘‘

فوائد: … آپ صلی اللہ علیہ وسلم کا نمازِ جنازہ نہ پڑھنا، یہ ایک تادیبی کاروائی تھی، آپ صلی اللہ علیہ وسلم اس مقام پر اپنے عمل کے ذریعے اس فعل کی سنگینی کو بیان کرنا چاہتے تھے، تاکہ لوگ عبرت حاصل کریں، وگرنہ حدیث نمبر (۶۴۷۰) کے فوائد میں دی گئی حدیث کے مطابق آپ صلی اللہ علیہ وسلم نے ایسے شخص کے لیے مغفرت کی دعا کی تھی۔

فوائد: … یہ واقعہ سیدنا ابو ہریرہ رضی اللہ عنہ نے بیان کیا، کہا گیا ہے کہ یہ آدمی منافق تھا اور اپنے مفاد کی خاطر جنگ میں شریک ہوا تھا، اس کی شجاعت نے صحابہ کرامe کو بھی حیرت زدہ کر دیا تھا، تاہم ان کی حیرت رسول اللہ صلی اللہ علیہ وسلم کی صداقت دیکھ کر کافور ہوگئی۔
لیکن اس تاویل کی کوئی دلیل نہیں ہے کہ وہ اعتقادی منافق تھا، جہنمی ہونے کے لیےیہ لازم نہیں کہ وہ اعتقادی منافق ہو، کیونکہ ایسے جہنمی بھی ہوں گے، جو اپنے ایمان کی وجہ سے بالآخر جہنم سے نکال دیئے جائیں گے۔
(عبد اللہ رفیق)
یہ نقطہ ذہن نشین کر لینا چاہیے کہ نفس انسانی مطلق طورپر انسان کی ملکیت نہیں ہے، اس کا حقیقی مالک اللہ تعالیٰ ہے، انسان اس میں اتنا تصرف کر سکتا ہے، جتنی اللہ تعالی نے اس کو اجازت دی ہے،انسان کو تو یہ حق بھی نہیں دیا گیا کہ وہ اس وجود کے ذریعے اللہ تعالی کی معصیت والا کام کرے، چہ جائیکہ وہ اس وجود کو ہی ختم کر ڈالے۔